Edhe pse ankohet se Teatri Kombëtarë i Kosovës që një kohë të gjatë nuk i jep hapësirë për të inskenuar shfaqje, regjisorja Elmaze Nura mendon se vendi ku inskenohet shfaqja nuk është aq i rëndësishëm sa edhe koncepti regjisorial.

Ajo ka filluar të inskenojë shfaqjen “Trojanët” në teatrin “Dodona” për të cilët thotë se u falënderohet për mundësinë që ia kanë dhënë për të inskenuar një shfaqje që ajo e kishte në mendje qe një kohë të gjatë. “Vertet, unë ka kohë që kam pas ndërmend që ta inskenoj “Trojanët” mirëpo ka qenë e pamundur për shkak të fondeve. Vitin e kaluar kam aplikuar në Ministrinë e Kulturës, tani kjo ministri më ka mbështetur me një pjesë të bugjetit që kam kërkuar e cila ka bërë të mundur që të filloj me përgatitjet për këtë shfaqje”, ka thënë regjisorja Nura.

Për teatrin “Dodona” regjisorja Nura thotë se është alternativa më e mirë për inskenimin e shfaqjeve të ndryshme që artistët i kanë ndërmend. “Jo që në këtë teatër janë kushtet ideale për të punuar, mirëpo për neve është e mjaftueshme kjo mundësi”, është shprehur ajo. Sa i përket Teatrit Kombtarë, Nura thotë se nuk ka bërë kërkesë për këtë shfaqje pasi që sipas saj TKK-ja ka një kohë të gjatë që i ka dyert e mbyllura për një pjesë të artistëve.

“Nuk e di pse Teatri Kombëtarë i ka dyert e mbyllura për mua, për këtë ndoshta duhet të pyeten vetë drejtuesit e këtij institucioni. Për mua ka qenë alternative Dodona, por unë mendoj se as vendi as kenografia as kostumet nuk ta bëjnë shfaqjen e mirë por koncepti regjisorial. Unë kam punuar në Gërmi shfaqjen “Ëndrra e një nate vere” dhe shfaqja ka qenë shumë e mirëpritur në festivalet ndërkombëtare, kjo më ka bindur se nuk ka lidhje ku ti e inskenon shfaqjen”, ka thënë Nura.

Në këtë shfaqje bëhet fjalë për tragjedinë “Trojanet”. Kjo është një tragjedi antike e shkruar nga Euripidi. Regjisorja e ka adaptuar atë në rrethanat kosovare ku sipas saj “Trojanet”, vjen në skenë si protestë kundër luftës, vrasjeve dhe robërimit. Portreti artistik i pasojave të shkatërrimit të Trojës, vjen si një përshkrim i thellë i sjelljes barbare të grekëve që skllavëruan gratë dhe vranë fëmijë. 2500 vite më vonë në Kosovë, historia përsëritet. Gratë përdhunohen, burrat vriten, fëmijët masakrohen nga serbët.

Në shfaqjen “Trojanet”, gjejmë të bashkëdyzuar një tekst antik, i adaptuar për kohët moderne dhe pjesët koreografike shprehin përjetimet e luftës së fundit në Kosovë. Koeografinë e kësaj shfaqje e ka bërë Agnes Nokshiqi, ndërsa luajnë aktorët: Shpresa Salihaj, Dafina Berisha, Sindi Çitaku, Astrit Geci, Kremtim Krasniqi dhe Glauk Haxhijaj. Elmaze Nura ka bërë regjinë e disa shfaqjeve të cilat kanë pas mjaft sukses.

Në vitin 2011 më shfaqjen “Parfumeria”, Nura ishte shpërmbyer në Festivalit “Teatri Shqiptar në Maqedoni - Dibra 2011” si regjisorja më e mirë si dhe në Festivalin “Teatri Ndryshe” si “Regjisorja më Inventive” po me këtë shfaqje.