Ndërthurja e tre kompozitorëve si Gioachino Rossini, Peter Hope dhe Franz Schubert, duket perfekte për Orkestrën Simfonike të Filarmonisë së Kosovës. Kjo e fundit ka zgjedhur krijimtarinë e treshes së njohur botërore për koncertin e parë të këtij viti, i cili mbahet me datë 5 shkurt, në Sallën e Kuqe të Pallatit të Rinisë, me fillim nga ora 20:00.

Uvertura “L`italiana in Algeri”, koncertinot për fagot, harqe, harpë dhe perkusione, Simfonia 9 në C-dur, “Andante con moto “ në A-mol e shumë vepra tjera të kompozitorëve të lartpërmendur, këtë radhë vijnë të lidhura nën performancën e Filarmonisë, bashkë me dy mysafirët; dirigjentin nga Austria Claudio Buechler dhe fagotistin nga Tirana, Fatos Jaho. I fundit, si bashkëpunëtor që nga fillet e themelimit të Filarmonisë, gjithashtu profesor në Fakultetin e Muzikës në Prishtinë, tha se është detyrim moral i tij që të jetë kaq shpesh i pranishëm në skenën klasike kosovare, e që si produkt gjithmonë dalin bashkëpunimet e suksesshme.

“U detyrohemi vëllezërve kosovarë dhe skenës së këtij vendi që të jemi pranë. Unë jam ajo gjeneratë e artistëve shqiptarë e cila është tani e një dekadë afër institucionit të Filarmonisë së Kosovës. Koncerti i shkurtit është nder i madh për mua si solist” shtoi Jaho, artisti shqiptar i cili do të performojnë veprat e kompozitorit britanik Peter Hope. Dirigjenti austriak në anën tjetër, thotë se që nga hera e fundit që ka qenë në Kosovë, dy vite më përpara, orkestra e Filarmonisë ka shënuar progres.

“Treshja e kompozitorëve përmban një kombinim midis njerëzores, kënaqësisë dhe vuajtjes gati në pluhur. Schubert simfoninë në C-dur e shkroi në vitet e fundit të jetës kur ishte shumë i sëmurë, por prapë ajo ka plot pozitivitet dhe atmosferë hareje brenda. Ky koncert do të jetë plot jetë dhe muzikë, dhe besoj se do pritet mirë” shtoi dirigjenti Buechler, i magjepsur gjithmonë nga mikpritja që i bëhet në kryeqytetin kosovar.

Koncerti i 5 shkurtit fillimisht kishte të paracaktuar datën 29 janar, por për shkak të obligimeve dhe përshtatjes ndaj mysafirëve, Baki Jashari, drejtor i institucionit më serioz kulturor në vend, tha se ai pati shtytje. Të gjitha veprat në këtë koncert janë premierë dhe të paluajtura ndonjëherë në Kosovë.