Kompania filmike “Sony” tashmë i ka blerë të drejtat për realizimin e një filmi mbi jetën e Steve Jobsit, mendjes inovuese të kompanisë amerikane “Apple”. “Sony” të drejtat mbi biografinë e Jobsit i ka blerë nga Walter Isaacson.

Ndërkaq, shtëpia botuese amerikane “Simon & Schuster” po e përshpejton botimin e biografisë së bashkëthemeluesit të kompanisë “Apple”, i cili vdiq të mërkurën nga kanceri. “Simon & Schuster” fillimisht ka menduar ta botojë biografinë "Steve Jobs" më 21 nëntor por e ndryshoi datën më 24 tetor pas vdekjes së Jobsit. Isaacson ka punuar në biografi me Steve Jobs i cili njihej si një person tejet privat.

Intervistën e fundit me Steve Jobs ai e bëri muajin e kaluar. Isaacson, ish-drejtues i bordit të CNN-it dhe ish-redaktor përgjegjës i revistës “Time”, tashmë njihet edhe si një biograf i respektuar i cili mes tjerash ka shkruar për personalitete si Benjamin Franklin dhe Albert Einstein. Jobs i ka kërkuar biografit të bëjë libër për të në mënyrë që fëmijët e tij të kenë një ide të qartë se kush ishte ai.