Edhe pse numri i reperëve të njohur botërorë të cilët kanë mbajtur koncert në Prishtinë, vitet e fundit nuk ishte i vogël, kërkesat e tyre për të përformuar nuk ishin të mëdha. Pra, konsideroheshin të përballueshme për një shtet siç është Kosova, kur dihet se shumë nga ta kanë teke nga më të ndryshmet. Ndonëse mund të ketë adhurues të shumtë në Kosovë, ai i cili konsiderohet si reperi më i pasur në botë, Jay-Z duket i paarritshëm për të përformuar para publikut kosovar.

Kërkesat deri në detaje të parëndësishme të reperit Jay-Z siç shkruan në një kontratë të përgjithshme të tij, janë marramendëse. Kontraktuesi për koncertin e Jay-Z duhet t'i sigurojë artistit këtë lloj transporti tokësor me arritjen e tij e deri në largimin nga qyteti, ku mbahet koncerti: një veturë të zezë, modeli Maybach 57 ose 62 me dritare të zeza, një veturë tjetër të zezë, modeli SUV me dritare të zeza, një furgon për 15 pasagjerë dhe një furgon pa ulëse për valixhet.

Kontraktuesi duhet të sigurojë emrin e kompanisë transportuese dhe një kopje të ceritfikatës së sigurimit të kompanisë, e cila gjithashtu duhet të përfshijë përgjegjësitë dhe mbulimin e sigurimit për vdekje deri dhe jo më pak se 1 milion dollarë. Kontraktuesi duhet të kontaktojë menaxhmentin e produksionit të artistit të paktën katër (4) javë para performancës së tij për këshilla të plota teknike.

Përfaqësuesit e artistit do të kenë autoritet të vetëm dhe absolut në udhëheqjen e personelit lokal, sigurimit lokal, personelit të ndërtesës, dhe funksionimin e të gjitha pajisjeve të zërimit, dritës dhe çfarëdo pajisje tjetër të ndonjë produksioni tjetër, gjatë kontrollimit të zërimit, provave, koncertit dhe çfarëdo performance tjetër gjatë qëndrimit. Përfaqësuesit e artistit (menaxheri i turneut dhe menaxheri i produksionit) kanë kontroll ekskluziv në të gjitha detajet e përformancës gjatë angazhimit të artistit.

Kërkesa shtesë

Artistit mund t'i nevojitet një zhveshtore për backstage. Pajisjet për të duhet të aprovohen nga menaxhmenti i turneut të paktën katër javë para performancës. Artistit (Jay-Z) do t'i duhen shtatë dhoma të zhveshjes të vendosura mbrapa skenës, që janë larg publikut.

Këto dhoma duhet të kenë mundësi të mbyllen me çelës, i cili i jepet stafit të artistit menjëherë pas arritjes në vendin e përformancës. Kontraktuesi duhet ta informojë menaxherin e produksionit të artistit për ndonjë kufizim logjistik sa u përket dhomave të zhveshjes.

Dhoma 1 - dhoma e zhveshjes së Jay-z

Kjo dhomë duhet që të jetë për tetë persona. Duhet të ketë qasje private të paktën në një banjo me ujë të ftohtë dhe të nxehtë. Kjo dhomë duhet të jetë me mobile të pastra dhe temperaturë të përshtatshme gjatë gjithë kohës (me air condition ose ngrohje, varet nga temperatura jashtë, por temperatura e dhomës duhet të jetë 22 gradë celcius). Drita në këtë dhomë duhet të jetë e mirë për një atmosferë të relaksuar.

Preferohen llampat e tavolinës më shumë se drita flurushente. Dhoma duhet të ketë tepihë. Kjo dhomë duhet të përfshijë gjërat e mëposhtme: mobile me shije të një dhome dite, të cilat përfshijnë: një kauq të madh, një “Love seat” (ulëse britanike për dy persona), dy tavolina, dy llampa, dy tavolina të mëdha me mbulesa të përshtatshme për ushqim, katër karrige të lëvizshme, një pasqyrë të madhe, një varëse rrobash e lëvizshme, një enë për nxemjen e ujit dhe një mikrovalë.

Dhoma 2

Dy paketime me nga 48 shishe të ujit “Fiji” ( të ftohta në temperaturë të dhomës), 6 kanaçe të Coca-Cola, 6 kanaçe të Red Bull, 6 shishe me ujë me shije (me vitamina ose limon), 2 paketime me nga 6 shishe të birrës “Sapporo”, 1 shishe 750 ml të vodkës “Belvedere”, 2 shishe 750 ml të tekillës “Patron Silver”, 2 shishe verë të kuqe “Sassicaia”- italiane nga rajoni i Bolgher-it, 2 shishe me shampanjë “Armand de Brignac” dhe “Ace of Spades” dhe akull (për ndryshim të markës së produktit kërkojnë t’i njoftojnë me kohë), dy paketime me lëng portokalli dhe boronice, çaj të nxehtë për 4 persona, përfshirë ujin, filxhanët e qeramikës, limon të freskët, çajin në qese të llojit “Lipton” dhe mjaltë.

Një pjatë me fruta të freskët përfshirë: banane, mollë, portokaj dhe dardha. Një pjatë më të vogël me fruta të freskët përfshirë: ananas, dredhëza, rrush dhe manaferra. Një pulë e grirë në copa dhe djathë “cheddar”, një copë e bukës së bardhë, një paketim me gjalpë kikirikësh, një paketim me xhelatinë të rrushit, një paketim të cigareve “Malboro Light”, një çakmak, një paketim me minta “Altoids” dhe një shishe e vogël e sapunit të lëngshëm për duar.

Në fund të kontratës shkruan që të përfshihen të gjitha gjërat e nevojshme si: pjata, pirujë, lugë, thika, peceta dhe erëzat e nevojshme. Po ashtu thuhet që të sigurohen se të gjitha pijet e ftohta të kenë akull të mjaftueshëm. Kërkohet po ashtu edhe një çelës për shishe, thikë dhe një dërrasë për prerje, gota të ftohta, dhe 4 filxhanë për mikrovalë.