Në Londër është shtruar tapeti i kuq nën këmbët e Maryl Streep, për prezantimin e premierës evropiane të filmit “Zonja e Hekurt, Margaret Thatcher”. Për aktoren e njohur tashmë është paralajmëruar se roli i ish-kryeministres britanike mund t’i sjellë Oskarin e tretë.

“Në Mbretërinë e Bashkuar ka aq shumë ide rreth saj, të mira dhe të këqija. Unë jam përpjekur të zbuloj gruan pas karikaturave që kemi parë për aq shumë vjet dhe t’i shoh ato vite në këndvështrimin e saj”, tha Streep.

Historia e filmit tregohet në restrospektivë, përmes kujtimeve të një Margaret Thatcheri të moshuar dhe që vuan nga alzaimeri. Për këtë arsye filmi është kritikuar ashpër, pasi për shumë kritikë ai paraqet një panoramë mizore të moshës së thyer. Edhe klasa politike ka deklaruar se shfaqja e një historie të bazuar në rënien e një figure të rëndësishme publike ende në jetë, është diçka krejt pa shije.

Me gjithë polemikat, ka nga ata që thonë se filmi është një përpjekje për të rehabilituar reputacionin e një figure aq të përfolur në politikën britanike. Në Londër, reklamat janë vendosur tashmë anash çdo autobusi dhe pritet që filmi të jetë një sukses i ri kinematografik, të paktën artistikisht.