Liverpooli ka kompletuar blerjen e portugezit Raul Meirelese nga Porto.

Meireles ka nënshkruar një kontratë katërvjeçare në “Anfield”, pasi Liverpooli arriti një marrëveshje për çmimin prej 14 milionë euro për mesfushorin.

27-vjeçari do ta mbulojë boshllëkun e lënë nga largimi i pritshëm i Javier Mascheranos te Barcelona.

Meireles këmbëngul se Roy Hodgson ka luajtur një rol të rëndësishëm në vendimin e tij për të kaluar në Liverpool, por ai nuk dëshiron që të krahasohet me shënjestrën e Barcelonës, Mascheranon.

“Roy Hodgson ka qenë çelësi i ardhjes time këtu, sepse ai ka punuar shumë për të më blerë mua”, është cituar Meireles nga “Daily Express”.

“Unë jam Meireles dhe jo Mascherano dhe kjo do të jetë e qartë për tifozët. Shpresoj që një ditë tifozët e Liverpoolit do të më kujtojnë mua si lojtar i suksesshëm”, shtoi ai.