Fadil Vokrri do të sfidojë Fadil Vokrrin në garën për president të ri të Federatës së Futbollit të Kosovës (FFK). Vokrri, presidenti aktual i FFK-së, do të jetë kandidati i vetëm për president të ri në shtëpinë e futbollit të Kosovës në kuvendin zgjedhor që do të mbahet të enjten (sot) në restorantin “Te Rrethi” në Prishtinë.

Përveç mandatarit të ri/vjetër për katër vitet e ardhshme kuvendarët e futbollit kosovar do të zgjedhin edhe shtatë anëtarët e rinj të Bordit të FFK-së. Kuvendi zgjedhor i radhës pritet të verifikojë të gjitha mandatet e katër viteve të shkuara, pasi që të njëjtit njerëz janë kandiduar për t’i mbrojtur funksionet e tyre, e kjo do të thotë se futbolli i Kosovës do të vazhdojë me njerëz të njëjtë.

Kjo është hera e parë që në garën presidenciale për njeriun e parë të FFK-së do të jetë vetëm një kandidat, pasi që nuk ka asnjë mundësi të vetme që ndërkohë përballë Vokrrit të ketë një kandidat tjetër. “Nuk ka asnjë mundësi që ndërkohë të futet në garë ndonjë kandidatë tjetër, kështu që Vokrri do të jetë kandidati i vetëm për kryetar”, tha të mërkurën zëdhënësi i FFK-ë, Fazli Berisha. “Statuti nuk lejon që as para fillimit të kuvendit e as gjatë tij të paraqitet ndonjë kandidaturë e dytë, nëse kjo nuk është bërë në afatin e paraparë, dy muaj prej caktimit të datës së mbajtjes së kuvendit”, shtoi zëdhënësi i FFK-së.

Vokrri më herët kishte mbledhur thuajse të gjitha votat, 56 sosh, të delegatëve të kuvendit për t’u kandiduar për president, që kishte bërë të mbyllë çdo kandidaturë tjetër dhe si i vetëm të garojë drejt mandatit të dytë të tij si i pari i FFK-së. Në kuvend pritet të marrin pjesë gjithsej 59 delegatë, përfshirë edhe presidentin Vokrri.

Në bazë të Statutit, Vokrrit, për të mbetur president i FFK-së i duhen 2/3 e votave. “Fadil Vokrrit gjatë votimit i duhen së paku 40 vota që të sigurojë edhe një mandat katërvjeçar”, tha Berisha.

Para delegatëve të enjten do të jenë edhe shtatë emrat e kandidaturave të rajoneve për anëtarë të Bordit të FFK-së. “Të njëjtit njerëz që kanë qenë pjesë të Bordit në katër vitet e shkuara do të jenë sërish kandidatë për të fituar edhe një mandat tjetër, pasi që janë kandiduar nga rajonet e tyre”. Për të rifituar vendin e tyre në hierarkinë e futbollit kosovar kandidatët e rajoneve duhet të marrin 50 për qind të votave plus 1.

Nëse ndonjëri prej tyre dështon të marrë votat e nevojshme, ateherë rajonet gjatë kuvendit janë të obliguara që të paraqesin një kandidaturë tjetër. Sikurse për president, e ashtu edhe për anëtarë të Bordit, votat duhet të jenë të fshehta përderisa delegatët të vendosin të kundërtën, në këtë rast nuk ka se çfarë të ndodhë kështu pasi ka një kandidat. Bordi i FFK-së numëron 13 anëtarë, presidenti, përfaqësues të shtatë rajoneve dhe tre të tjerë i takojnë minoriteteve dhe femrave. Kuvendi zgjedhor fillon në orën 16:00.