Lëndimet janë kërcënim i përhershëm në karrierën e sportistëve, prej tyre nuk janë imunë as futbollistët kosovarë, sidomos duke pasur parasysh fushat e rënduara për lojë. Është numri i madh i futbollistëve të lënduar, i atyre që për shkak të lëndimeve kanë qenë të detyruar ta ndërpresin karrierën e tyre, por edhe të tillë që lëndimi ia ka zvarritur të arriturat pavarësisht talentit që kanë poseduar. Çka është më e keqja, në Kosovë mungon sigurimi shëndetësor dhe kjo po u kushton futbollistëve e skuadrave, varësisht se kush i heq shpenzimet.

Vetëm një rezonancë magnetike, e cila do të zbulonte një lëndim të futbollistëve pas një ndeshjeje, kushton mbi 200 euro, për të mos llogaritur edhe terapitë e tjera deri te ndërhyrjet kirurgjike, barnat e fizioterapitë që shpesh detyrohen t’i kalojnë futbollistët.

Njëri ndër futbollistët e lënduar rëndë ka qenë edhe Elhami Berisha, i cili në mungesë të sigurimit shëndetësor është shëruar në Austri.

“ Mendoj se sigurimi shëndetësor është më se i nevojshëm veçmas për ne futbollistë të cilët lëndohemi shpesh. Unë kam përvojë të hidhur kur para dy viteve pësova lëndim të rëndë në gju dhe më është dashur intervenimi kirurgjik. Vendosa të shkoj në Austri e të operohem, dhe posa arrita atje, më pyetën se a e ke sigurimin shëndetësor. Drejtuesit e Hysit më patën thënë se pas kthimit t’ua dorëzoj faturat në mënyrë që të më hiqen shpenzimet, por kjo nuk ka ndodhur, kështu që unë me shpenzimet e familjes jam shëruar”, tha Berisha. “Në klubet tona askush në kontratë nuk e ka të precizuar sigurimin shëndetësor”.

Është e qartë se klubet hezitojnë të merren me këtë çështje, por as drejtuesit e Federatës së Futbollit nuk kanë bërë diçka konkrete në këtë aspekt për të kushtëzuar klubet me rastin e licencimit të klubeve. Sekretari i përgjithshëm i FFK-së, Eroll Salihu premton se së shpejti kjo gjë duhet të rregullohet.

“Përkundër kushteve që i kemi, mendoj se është absurde që sot të mos jemi në gjendje ta mbrojmë një futbollist nga lëndimi, qoftë ai i lehtë apo i rëndë. Jam i bindur se kjo çështje do të rregullohet brenda 4-5 muajve. Ne kemi biseduar për këtë edhe më pare dhe kemi pasur oferta, por që nuk kemi hasur në gjuhë të përbashkët me klubet tona.

Duhet të merret vendim nga Komiteti Ekzekutiv për këtë çështje në mënyrë që futbollistët ta kenë sigurimin shëndetësor, në të kundërtën ata mund t’i ndërpresin kontratën me klube”, tha Salihu. Duket se mungesa e shoqatës së futbollistëve dëshmon edhe kësaj here se nuk ka zë të vetë lojtarëve për problemet që i kanë.

Për dallim nga përvoja e hidhur e Elhami Berishës. Ka edhe raste kur klubet kanë shprehur gatishmëri që t’u ndihmojnë futbollistëve të lënduar. Rasti i Isuf Llumnicës është për t’u lavdëruar, pasi FC Prishtina ia hoqi të gjitha shpenzimet e operimit të ligamentit të gjurit në Shkup dhe falë shërimit mesfushori tani është pjesë e skuadrës zvicerane Winterthur. Edhe futbollistët Behar Maliqi e Suad Saliagiq kanë marrë pëlqimin e klubit dhe gjatë kësaj jave pritet të operohen. Janë këta vetëm disa shembuj, por ka edhe shumë të tjerë fatkeqësisht negativë kur futbollisti e pëson vetëm se nuk e ka sigurimin shëndetësor.

Trajnerët e skuadrave duken të pafuqishëm në këtë aspekt pasi nuk është në dorën e tyre të vendosin për gjëra të tilla.

“Mungesa e sigurimit shëndetësor është dukuri shqetësuese kur dihet se lëndimet tek futbollistët janë të shpeshta kurse rehabilitimi kushton shumë. Klubet janë në gjendje të tillë që rrallë herë e ndihmojnë lojtarin, kështu që ata duhet të gjejnë mënyrë tjera nëse duan t’i kthehen lojës së futbollit. Më kujtohet rasti i lëndimit të Arben Zhjeçit, i cili kishte tretman në Austri dhe për këtë e ka ndihmuar Departamenti i Sportit.

Edhe kontrollimi i futbollistëve para kampionatit më duket se është formale dhe se duhet të jetë sistematik, pra më i shpeshtë. Nuk e di se sa janë të specializuar mjekët, ndonëse aparatura sa e di unë është e re”, tha kryetrajneri i 2 Korrikut, Arsim Thaçi, i cili një ndër mënyrat e zgjedhjes e sheh edhe në kontratat e futbollistëve.

“Nëse një futbollistë mendon të arrijë lartë, ai duhet të precizojë kontratën ku do të kërkoi edhe sigurimin shëndetësor, apo kushte më të mira në mënyrë që në rast të lëndimit të ketë mundësi që vet t’i heq shpenzimet e rehabilitimit”, tha Thaçi.