Futbollistët e Prishtina tashmë i janë kthyer normalitetit dhe stërvitjeve intensive të drejtuara nga kryetrajneri gjerman, Wolfgang Jerat, mirëpo ende nuk është përcaktuar lista definitive e lojtarëve që do të mbeten dhe atyre që do të largohen ndërkohë nga klubi bardhekaltër.

Ka kohë që po përmendet një transfer-listë, por e cila deri më tashti nuk është publikuar. Më herët është bërë me dije se nga klubi do të largohen së paku tetë lojtarë, pasi që numri i tyre është shumë i madh.

“Në përgatitjet e ardhshme nuk do të udhëtojnë të gjithë futbollistët”, ka thënë nënkryetari i FC Prishtina, Afrim Muçiqi. Sipas tij, lista sigurisht së do të redukohet, por nuk ka dhënë emrat e atyre që do të mbeten në shtëpi apo jashtë ekipit.

“Në përgatitjet e ardhshme nuk do të udhëtojnë të gjithë futbollistët pasi lista pritet të reduktohet, por që për këtë çështje do të vendosë kryetrajneri Jerat. Ata që nuk do të udhëtojnë në përgatitjet e ardhshme do të mbeten në kryeqytet dhe do të vazhdojnë me stërvitje për të qenë të gatshëm në çdo moment kur nga ata kërkohet të kyçen me skuadrën e parë, por do të ketë edhe të larguar”, shtoi Muçiqi.

“Të hënën pritet të publikohet lista e lojtarëve që do të udhëtojnë me klubin dhe atyre që do të mbeten në Prishtinë”.

Bardhekaltërit javën e shkuar ishin kthyer nga Ulqini, ku kishin qëndruar për 12 ditë me radhë dhe pritet që sërish të dalin jashtë Kosovës, për të kryer edhe një pjesë tjetër të përgatitjeve. Muçiqi ka bërë të ditur se ende nuk është vendosur se cila do të jetë baza e ardhshme stërvitore e ekipit.

“Një gjë dihet se pas datës 20 shkurt do të shkohet në përgatitje, diku jashtë Kosovës, por ende nuk dihet saktësisht se në cilin vend. Ofertat janë të shumta që nga Antalia në Turqi, pastaj në Gjermani, Shqipëri, Mal të Zi e Maqedoni”, shtoi nënkryetari i ekipit prishtinas.

Ndërkohë ekipit i është bashkangjitur Astrit Fazliu, i cili për shkak të lëndimit kishte munguar gjatë përgatitjeve të para në Ulqin. Pushimi që zgjati dy ditë më shumë nuk e ka prishur fare atmosferën e mirë në klub.

“Të gjitha obligimet ndaj futbollistëve janë kryer, madje është miratuar buxheti edhe për dy vjetët e ardhshme, kështu që në këtë aspekt nuk do të ketë probleme. Sa u përket përgatitjeve, bora e madhe pamundëson që ato të mbahen në ambient të mbyllur, kështu që po shfrytëzohet ambienti i mbyllur në “Princ” dhe çdo gjë po shkon sipas planit të paraparë nga shtabi teknik”, tha Muçiqi.

Hopp zyrtarisht ndihmës i Jeratit

Numri i trajnerëve gjermanë në skuadrën e Prishtinës është rritur. Në fakt Wolfgang Jerat nuk do të jetë i vetëm pasi edhe zyrtarisht prej së dielës ndihmës i tij do të jetë, bashkëkombasi i tij, Joachim Hopp.

Hopp ishte me ekipin prishtinas gjatë përgatitjeve në Ulqin, por nuk dihej nëse ai përfundimisht, do të vazhdonte të mbetej në radhët e tij. Nuk ka dyshim se angazhimi i Hoppit tregon seriozitetin e drejtuesve të skuadrës lidere në futbollin kosovar.