Me afrimin e kongresit të 19 me radhë të FIBA-s që do të mbahet në Stamboll (nga 3-6 shtator), njoftimet për pranimin e Federatës së Basketbollit të Kosovës në FIBA janë gjithnjë e më të zëshme. Përfaqësuesi serb në FIBA, Zharko Paspalj vlerëson se ky është realiteti dhe nuk duhet të habitemi nëse vjen deri te pranimi i Kosovës.

“Kosova ka mbështetjen e fuqive botërore politike, por edhe të atyre sportive, dhe nuk ka asnjë dyshim që ata do t’ia dalin ta fusin si temë diskutimi çështjen e tyre në FIBA. Është e thjeshtë, ulen udhëheqësit e FIBA-s nga shtetet e pasuksesshme në basketboll, dhe nuk u interesojnë ndjenjat e të tjerëve, e në të njëjtën kohë, as për ndjenjat tona”, është shprehur Paspajl për portalin serb, “Alo”.

Ai mendon se FB e Serbisë nuk mund ta ndalojë atë të Kosovës të anëtarësohet në FIBA.

“Mendoj se nuk kemi mundësi. Udhëheqësit e federatës sonë mund të paraqesin ankesë, mirëpo atë veprime tona nuk kanë asnjë rëndësi, pasi që neve FIBA vazhdimisht na refuzon. Është reale të mendohet që FBK, me përkrahjen që e ka, të bëhet anëtare e FIBA-s, nëse jo sivjet, atëherë më së largu pas një apo dy vjetësh”, u shpreh për fund Zharko Paspalj, raporton “Alo”.