Basketboll. Amerikani Bryan Williams është bërë “xehetar” në betejat për titull kampioni dhe kupën e Kosovës. Williams, 22 vjeçar (205 cm) ka të verifikuara cilësitë e tij dhe si i tillë është angazhuar në radhët e mitrovicasve.

Trajneri Ilir Selmani, që mbylli pjesën e parë ta kampionatit në vendin e parë me 27 pikë, sa ka edhe Sigal Prishtina, në vendin e dytë, por që në bazë të kosh dallimit më të mirë dimëroi në vendin e parë me këtë përforcim të nevojshëm me optimizëm e pret vazhdimin e kampionatit.

Drejtori i Trepçës, Besim Braha, tha se “xehetarëve” u është kthyer edhe Besnik Azemi dhe Fikret Hanxhiq, të cilët kanë zhvilluar stërvitjet e para me ekipin. “Fikret Hanxhiq ka arritur të hënën në Mitrovicë”, tha Braha dhe shtoi se Trepça tashti ka ambicie për pjesëmarrje në garat e përfundimtares dhe titullin e kampionit.

“Edhe skuadrat tjera janë përforcuar dukshëm, me çka është paralajmëruar pranverë e nxehtë, në të cilën katër skuadrat e para do të marrin pjesë për titullin e më të mirit. Kur ishte fjala për amerikanin Jaled Nelson, ai e ka vendin e sigurt në Trepçë”, tha Braha, sipas të cilit ai do të arrijë me 20 janar. Trepça nga 21 janari do qëndrojë në Ulqin, për të vazhduar përgatitjet, ku edhe ka paraparë të zhvillojë edhe dy ndeshje kontrolluese me disa skuadra të Ligës së parë të Malit të Zi.

B.Abazi