Komisioni Disiplinor i Federatës së Basketbollit të Kosovës pas hapjes së procedurës disiplinore ka marrë vendim për ndëshkimin e atyre të cilët nuk patën sjellje korrekte gjatë fundit të pjesës së parë të BKT Superligës dhe gjatë manifestimit për shpalljen e më të mirëve në basketbollin kosovar.

Ndihmëstrajnerit të Sigal Prishtinës, Fikret Shatrit, i tërhiqet vërejtja e fundit, por edhe shkarkohet nga posti i ndihmëstrajnerit të përfaqësueses së Kosovës në basketboll. Edhe drejtorit të KB Trepça, Naim Hajrizit, i tërhiqet vërejtja e fundit, por edhe fshihet nga lista e vëzhguesve për ndeshjet zyrtare që i organizon FBK-ja.

Basketbollistit të Trepçës, Drilon Hajrizit, përveç që i tërhiqet vërejtja e fundit, por kërkohet nga përzgjedhësi i përfaqësueses së Kosovë që ta pezullojë aktivitetin e Hajrizit në përfaqësuese, por që edhe FBK-ja t’i përgjigjet negativisht ndonjë kërkese të mundshme nga jashtë për letër-dalje të basketbollistit. Se sa do të zgjasë kjo varet nga vendimi i përzgjedhësit dhe drejtuesve të FBK-së, gjithnjë duke marrë për bazë sjelljet e Drilon Hajrizit në të ardhmen.

Më lehtë shpëtojnë basketbollistet Arta Mustafa, Kimete Haliti e Arbnore Përçuku të cilave u tërhiqet vërejtje e fundit, por pa pasoja tjera.

B. B.