Në kuadër të përgatitjeve për vazhdimin e BKT Superligës, e cila fillon më 4 shkurt, ku synojnë ta mbrojnë titullin e kampionit, basketbollistët e Prishtinës po zhvillojnë edhe ndeshje kontrolluese, të cilat janë pasqyrë më e mire e formës momentale së basketbollistëve. Deri tash Sigal Prishtina ka zhvilluar dy ndeshje, një në Shkup kundër Lirisë, kurse të dytën në kryeqytet kundër Futurës.

Ajo që zgjon kërshërinë e tifozëve të kësaj skuadre, veçmas Plisave, është paraqitja e dy basketbollistëve amerikanë Gerald Inman e John Gilchrist, të cilët së fundi kanë përforcuar radhët e kësaj skuadre dhe nga të cilët prishtinasit presin mjaft.

“Përgatitjet po shkojnë mjaft mirë dhe tash për tash nuk kemi shumë telashe. Sa u përket përforcimeve, është herët të flitet më shumë për cilësinë e tyre, pasi me kalimin e kohës gjithsesi do të komponohen mirë në skuadrën tonë, por nuk dyshoj se të dytë janë basketbollist cilësorë dhe se do ta arsyetojnë ardhjen në Sigal Prishtinë”, tha kryetrajneri i Sigal Prishtinës, Arben Krasniqi, i cili pret që në ndeshjet e ardhshme miqësore do të shihen më mirë mundësitë jo vetëm të dy amerikanëve, por edhe forma e basketbollistëve të tjerë.

Ndonëse pritej që kjo skuadër të udhëtojë për në Turqi, ku do të duhej t’i zhvillonte disa ndeshje me skuadra të forta, kjo megjithatë nuk do të ndodhë. Mirëpo, ndeshjet miqësore do të vazhdojnë të zhvillohen sipas planit të timonierit Krasniqi dhe atë me klube nga rajonit.

Kështu, të martën (sot) duke filluar nga ora 18:00 në pallatin se Sporteve në kryeqytet Sigal Prishtina takohet për herë të dytë brenda një kohe të shkurtër me Lirinë e Shkupit, ndërkohë që të mërkurën në Shkup e zhvillon ndeshjen e radhës, ku për kundërshtar do ta ketë skuadrën e Rabotniçkit. Më pas do të zhvillohen edhe disa ndeshje me skuadra nga Maqedonia.

Sigal Prishtina së bashku me Trepçën kryesojnë renditjen, kurse në ndeshjen e parë kampionate do të takohet në kryeqytet me rivalin e madh Pejën.