Lojtarët e Trepçës po vrapojnë dhe punojnë me intensitet të shtuar në Ulqin dhe njëherësh po ëndërrojnë dy titujt e baketbollit kosovar këtë sezon. Krerët e klubit ia mundësuan atyre që të udhëtojnë në këtë qytet bregdetar, e ata këtë të mirën e tyre po tentojnë që t’ia kthejnë me përgatitje të mirë dhe titullin dhe kupën e Kosovës.

Ekspedita e ekipit mitrovicas në përbërjë të saj ka lojtarët I.Tahiri, A.Tahiri, Haxhiu, Hajrizi, Hanxhiq, Azemi, Asllani, V.Hajrizi, Sylejmani, G. Asllani, Halili, Mustafa dhe dy përforcimet e huaja, Wiliams dhe Nelson, derisa pjesë e saj janë edhe shtabi teknik në krye me Selmanin dhe ndihmesin e tij, Tahiri.

“Xehetarët” për tetë ditë do të qëndrojnë në Ulqin, ku do përgatiten teknikisht, taktikisht, por edhe do të zhvillojnë disa ndeshje miqësore me ekipe malazeze, si Ulqinin, Podgoricën dhe Llovqenin. “Këto përgatitje dhe ndeshje kontrolluese që planifikojmë t’i zhvillojmë do të jenë vendimtare sa i përket asaj se në cilët lojtarë do të llogarië në vazhdim të kampionatit”, tha trajneri Selmani.

Ekipi mitrovicas është përforcuar me dy të huaj, amerikanët Williams dhe Nelson, kurse ndërkohë janë kthyer Azemi dhe Hanxhiq, që do të jenë ndihmesë në garën për titullin e kampionit të Kosovës. Trajneri mitrovicas në këtë situatë është optimist i madh. “Besoj në këtë ekip dhe kjo më bën optimist para sfidave që na presin në kampionat dhe garat e kupës”, tha Selmani.

Hiç më pak optimist nuk është edhe drejtori Besim Braha. “Me përforcimet që kemi bërë nga jashtë dhe me kthimin e Azemit dhe Hanxhiqit mendoj se kemi gjasa reale të luftojmë në të dy frontet, në garën për titull dhe kupën. Është reale të presësh rezultate dhe suksese kur në klub mbretëron një atmosferë e mirë”.

“Edhe ekipet e tjera janë përforcuar, por megjithatë pa ndiejnë nënçmim mendoj se në pranverën e nxehtë Trepça do të tregoj se është më e mira”, tha drejtori Braha. Trepça pritet të qëndrojë në Ulqin së paku tetë ditë. Mitrovicasit pas pjesës së parë të BKT Superligës së Kosovës kanë përfunduar në pozitën e parë të tabelës, së bashku me Sigal Prishtinën.