Kompania zvicerane e sigurimeve, me përfaqësi në Kosovë ENB, është bërë sponsor i Klubit të hendbollit Kosova e Vushtrrisë.

Me rastin e nënshkrimit të marrëveshjes, e cila fillimisht e ka mbështetur klubin me 5 mijë euro për vitin 2012, Arsim Hyseni, përfaqësues i kompanisë, tha se po e ndihmojnë klubin e hendbollit, duke qenë të bindur se sporti afirmon shtetin e ri të Kosovës.

“Me këtë donacion do të kishim dëshirë që KH Kosova e Vushtrrisë të arrijë një nivel të duhur për të qenë konkurrent deri në arenën ndërkombëtare”, tha Hyseni.

Për këtë ndihmë të mirëseardhur për klubin, Sadik Xhema, koordinator i KH Kosova, tha se do të mundohen që me sukses ta shpërblejnë besimin e donatorit.

“Shpresoj që me tifozët e zjarrtë që i kemi do të arrijmë ta përfaqësojmë Kosovën jashtë vendit dhe të korrim suksese edhe në arenën ndërkombëtare”, tha Xhema.

Për mbështetjen për të rinjtë vushtrrias, konkretisht sportistët e KH Kosova, Qamil Sahiti, drejtor i kulturës e sportit në Komunën e Vushtrrisë, ka falënderuar kompaninë ENB.