Skandal në Nish. Pas ndeshjes së ditës së enjte mes Maqedonisë dhe Çekisë (27:21), edhe hendbollistët e reprezentacionit të Maqedonisë u janë bashkuar tifozëve maqedonas për të brohoritur dhe kënduar këngë antishqiptare.

Duke fyer dhe ofenduar shqiptarët, hendbollistët dhe tifozët maqedonas kanë festuar fitoren ndaj çekëve dhe plasmanin në raundin e dytë të Kampionatit evropian të hendbollit, që po zhvillohet në Serbi. Gazetari i sportit në RTMV2, programi në gjuhën shqipe, Sami Ademi, ka qenë gazetar i vetëm shqiptar i pranishëm në vendin e ngjarjes.

“Ka qenë diçka rrëqethëse për mua, sepse nuk mund t’iu besoja as syve, e as veshëve se për çfarë arsye shahen shqiptarët. Gjatë tërë ndeshjes brenda në sallë, jashtë saj dhe në çdo kafeteri ku ishin tifozët maqedonas janë fyer shqiptarët. Pothuajse në çdo pesë minuta është dëgjuar refreni: le ta dinë shqiptarët e mallkuar se emri maqedonas asnjëherë nuk do të humbet”, tha Ademi.

Lidhur me incidentin e dytë (i pari ndodhi para pak ditësh nga tifozët maqedonas), ka reaguar Lëvizja Qytetare ZGJOHU!. “Tifozët e Maqedonisë mllefin e pakuptueshëm e drejtojnë drejt shqiptarëve edhe pse luajnë me Suedinë, Gjermaninë, Çekinë. Edhe më skandaloze ishte brohoritja e një këngë në të cilën ofendohen shqiptarët pas përfundimit të ndeshjes nga ana e lojtarëve të kombëtares së Maqedonisë në hendboll bashkë me tifozët”, thuhet në reagimin e ZGJOHU.