Afati kalimtar për hendbollistë dëshmoi gjendjen e rëndë nëpër të cilën ndodhen ekipet kosovare. Madje as klubet që pretendojnë titullin nuk u shfaqën në këtë afat të kalimit, dukuri kjo e re në hendbollin tonë e që nuk premton cilësi në vazhdim të edicionit. Shpresa e vetme mbetet nëse skuadrat mendojnë të angazhojnë hendbollistë të huaj për të cilët afati vazhdon deri në fund të muajit shkurt.

Nga 14 kërkesat për ta ndërruar klubin, 13 prej tyre janë në konkurrencën e meshkujve, kurse në konkurrencën e femrave, vetëm hendbollistja e Kosovës së Vushtrrisë, Kaltrina Beka ka bërë kërkesë që të kalojë në radhët e Kastriotit të Ferizajt.

Më i angazhuari në këtë afat doli të jetë ekipi i Deçanit i cili paraqiti për të përforcuar radhët e veta madje katër lojtarë të Besa Famiglia (Ron Berisha, Gjergj Berisha, Dardan Belegu, Jetmir Çekaj).

Të gjithë ata që kanë bërë kërkesë, duhet ta kompletojnë dokumentacionin brenda katër ditëve në mënyrë që ato të shqyrtohen nga Komisioni për Regjistrimin e Lojtarëve.

B. B.