Trajneri i ekipit përfaqësues të Kosovës U-20, Taib Kabashi, e ka pritur një triumf të djelmoshave të tij në turneun e Pavarësisë, mirëpo jo në aq mënyrë bindëse, siç e kanë bërë ata. Kosova U-20 e ka rehatuar së pari Bullgarinë (35:16), e më pas edhe Maqedoninë (28:17), për t’u bërë për herë të dytë fituese e turneut tradicional.

“Thjesht kam besuar se do të fitojmë turneun, por jo aq bindshëm, që të mposhtim kundërshtarët tanë me aq shumë gola diferencë”, tha Kabashi. “Këtë e kemi bërë edhe vitin e shkuar, me më shumë djersë, por që në asnjë mënyrë nuk e zbeh triumfin tonë, kur dihet se kemi pasur pare vete kundërshtarë shumë të fortë”.

Ai tha se triumfi ka treguar se Kosova është në rrugë të mirë që të ketë një ekip të fortë përfaqësues në të ardhmen. “Me gjithë telashet e mëdha që i kemi pasur për t’u përgatitur për këtë turne, ekipi ka treguar karakter të fortë. Kemi punuar në kushte të vështira, në temperatura të ulëta, por në fund kemi mbledhur forcë dhe kemi mposhtur kundërshtarë që kanë arritur rezultate të mira në kampionate botërore dhe evropiane”, shtoi trajneri i përfaqësues kosovare U-20.

“Kjo tregon se bëhet fjalë për një ekip të çeliktë dhe të fortë dhe në të cilin duhet besuar në të ardhmen. Lirisht mund të them se kjo është një gjeneratë e artë e hendbollit kosovar, me të cilën kam filluar punën vite me parë. Ajo tashmë në supe ka më shumë se 50 ndeshje ndërkombëtare dhe kjo vetvetiu tregon është duke u zhvilluar dhe është në rrugë të mirë që nesër të jetë boshti i ekipit përfaqësues për senior, kur hendbolli kosovar do të fitojë të drejtën të marrë pjesë në kualifikime për kampionate botërore dhe evropiane”, tha Kabashi.

Triumfi në turneun e Pavarësisë, sipas Kabashit, vetëm sa ka konfirmuar se hendbolli kosovar nuk është larg vendeve të rajonit por edhe me gjerë. “Po tregojmë se mund të mbahemi mirë me ta, bile edhe t’i mposhtim keq. I kemi mposhtur maqedonët, bullgarët, turqit, e në radhë së shpejti do të vijnë edhe Serbia, Mali i Zi e Kroacia e më lart”, tha në vazhdim Kabashi.

Gjatë muajit të ardhshëm Kosova U-20 pritet që sërish të luajë me Maqedoninë dhe Malin e Zi, i cili ishte paralajmëruar të marrë pjesë në turne, por për shkak të kushteve të vështira klimatike e kishte anuluar ardhjen në Prishtinë.

Plisat djegin flamurin maqedonas, reagon FHK-ja

Grupi i tifozëve prishtinas “Plisat” e ka shfrytëzuar finalen e turneut në hendboll për të djegur flamurin maqedonas dhe për t’iu hakmarrë tifozëve maqedonas për ofendimet e këtyre të fundit gjatë kampionatit evropian të mbajtur muajin e shkuar në Serbi. Lidhur me këtë rast ka reaguar edhe Federata e Hendbollit të Kosovës (FHK).

“...na vjen shumë keq për incidentin që ka ndodhur. Ky është një akt që e kanë kryer disa persona dhe nuk është qëndrim edhe i hendbollit kosovar dhe tifozëve të sportit në Kosovë. Shpresojmë se ato që kanë ndodhur Prishtinë dhe në Euro 2012 nuk do të ndikojnë në marrëdhëniet e shkëlqyeshme dhe bashkëpunimin e dy federatave, që ka filluar shumë vite më parë”, thuhet në kumtesën e FHK-ës.