SUPER LEAGUE (G). Mesfushori shqiptar, Emiliano Vila, me golin e tij të shënuar që doli të jetë i vetëm në tërë ndeshjen, ka gëzuar Janinën, duke i sjellë fitore ndaj rivalit, Panaitolikos (1:0). Vila u aktivizua në lojë me të filluar pjesëloja e dytë, ndërsa gjeti rrugën e golit në minutën 71, për t’u ndëshkuar me karton të verdhë vetëm një minutë më vonë.

Vila me këtë gol u shndërrua në shpëtimtarin e ekipit, duke e larguar atë për momentin nga zona e rrezikshme.

Mbrojtësi tjetër shqiptar, Andi Lila ka luajtur 90 minuta, por gjatë pjesëlojës së parë u ndëshkua edhe ai një herë me karton të verdhë.

SERIE A. Samir Ujkani pësoi dy gola nga ish-skuadra e tij, Palermo, e cila mposhti Novarën të dielën pasdite me shifrat 2:0. Ujkani, ndonëse u dëshmua në shumë raste, nuk arriti të shpëtojë plotësisht ekipin e ri. Kartoni i portierit të kombëtares shqiptare është në bashkëpronësi të Palermos dhe Novarës. Agon Mehmeti ishte vetëm rezervist në radhët e vendësve.

Valon Behrami ka luajtur si zakonisht titullar i padiskutueshëm i Fiorentinës, e cila të dielën paradite ka mposhtur Sienën në shtëpi (2:1). Behrami ka luajtur 90 minuta duke qenë ndër më të mirët në “Artemio Franchi”.

Blerim Xhemajli u ndëshkua me karton të verdhë gjatë paraqitjes së tij të plotë për Napolin, i cili pësoi humbje si mysafir te Gjenova (3:2). Tetovari u ndëshkua me të verdhën në minutën 50.

Erjon Bogdani ka luajtur 10 minutat e fundit në humbjen që Cesena e pësoi në shtëpi nga Atalanta e Bergamos (0:1).

Përparim Hetemaj bëri vetëm 15 minuta lojë në humbjen e së dielës që e pësoi në shtëpi, Chievo Verona nga Lazio (0:3). Në radhët e ekipit mysafir mungon prej javësh për shkak të lëndimit, Lorik Cana.

BUNDESLIGA I. Beg Ferati u detyrua të futet në lojë në minutën e 7-të të ndeshjes që Freiburgu i tij e humbi të dielën te Mainz (3:1). Ferati u aktivizua në mbrojtje pas një kartoni të kuq që e mori një bashkëlojtar i tij.

Odise Roshi u angazhua në 20 minutat e fundit për Kelnin, i cili u mposhtë në shtëpi nga mysafiri, Schalke (1:4). Roshi vazhdon të përfitojë përkrahje për paraqitjet e tij te skuadra e Kelnit, ndonëse ekipi po vuan për rezultate pozitive.

EREDIVISIE. Emir Bajrami luajti 57 minuta në fitoren e radhës të ekipit të tij, Twente, i cili të dielën deklasoi skuadrën e Groningenit (4:1). Me këtë fitore ekipi i sulmuesit shqiptar është ngritur në vendin e dytë dhe mbetet vetëm dy pikë mbrapa liderit, PSV Eindhoven.