Iku edhe edhe një afat kalimtar pa asnjë futbollist të shitur në Evropë nga Kosova. Për dy muaj të plotë futbolli kosovar ka dështuar të ofrojë së paku një futbollist për ekipet e huaja. Kështu futbolli kosovar e ka vazhduar traditën e viteve të fundit, kur eksporti i tij ishte thuajse i barabartë me zero. Përjashtim këtu bëjnë disa transferime të lojtarëve në liga të ulëta apo në ligat e rajonit.

Kanë munguar transferime të mëdha që nga koha e Debatik Currit dhe Armend Dallkut, kur ata para katër vjetëve ikën drejt Ukrainës. Nderin e futbollit kosovar gjatë këtij afati kalimtar mund ta ruajnë dy–tre futbollistë që aktualisht janë duke u provuar në Zvicër dhe Suedi. Bëhet fjalë për Semir Ramizin, Ilir Berishën dhe Genc Sermaxhaj.

Lojtarët ankohen se nuk ka kush t’i shesë (menaxherët), e ata që duhet t’i shesin, thonë se nuk kanë çka të shesin. “Lojtarë ka, po nuk ka njerëz me i transferuar ata”, tha Mentor Zhdrella, mesfushori i Hysit dhe aktualisht lojtari më i mirë në futbollin kosovar.

“Ka shumë menaxherë shqiptarë, por ka pak të atillë që sot mund të kryejnë punë. Menaxherët i marrin lojtarët, i çojnë jashtë dhe pas pak ditësh ata kthehen në shtëpi pa kontrata”, shtoi tri herë radhazi më i miri i futbollit kosovar. Zhdrella tha se kjo është dëshpëruese për lojtarët dhe futbollin kosovar.

“Kjo është humbje për ne lojtarët, por në të njëjtën kohë edhe për futbollin e Kosovës, pasi që po lëmë vend për dyshime, se këtu në Kosovë nuk ka lojtarë”. “Nëse kësaj i shtohet edhe fakti që një pjesë e mirë e lojtarëve shkojnë jashtë të papërgatitur, atëherë rezultati dihet paraprakisht”, tha Zhdrella, i cili edhe vetë disa herë ka tentuar të transferohet jashtë, por gjithnjë është kthyer në Kosovë.

“Thjesht nuk mund të dilet jashtë normales, pra duhet të pranojmë realitetin, kur dihet se në çfarë kushtesh punohet dhe si po zhvillohet futbolli ynë”.

Menaxheri kosovar, Nexhmedin Haxhiu, ka dalë në mbrojtje të kolegëve të tij. Ai është duke qëndruar për më tepër se një muaj në Antali të Turqisë dhe ankohet se nuk ka çka t’u ofrojë klubeve.

“Jemi në hall të madh këtu në Antali. Kemi kërkesa jashtëzakonisht të mëdha për të shitur lojtarë, por ku t’i gjejmë ata”, tha Haxhiu. “Ka më shumë se një muaj që jam këtu në Antali dhe ka pak lëvizje të futbollistëve shqiptarë, qoftë nga Kosova apo Shqipëria”.

“Kjo tregon se sa larg jemi nga vendet e tjera sa i përket futbollit dhe në çfarë niveli është ai. Nuk je në gjendje që të kesh së paku një lojtar për t’ia ofruar klubeve”, tha Haxhiu. Trajneri shumëvjeçar dhe njohës i mirë i rrethanave të futbollit kosovar, Hysni Maxhuni, është i prerë sa i përket daljes së futbollistëve jashtë kufijve të Kosovës.

“Nuk ka lojtarë për të shitur”, tha Maxhuni. “Puna që po bëhet tek ne nuk mjafton që të jemi vend që eksporton futbollist. Nuk po punohet sa duhet nëpër klube dhe nuk ka kushte për punë më të mirë. Kjo po ndikon që të kemi një ligë të dobët, e me këtë edhe lojtarë që mund t’i shesim jashtë”.

“Nuk ka të bëjë aspak me menaxherë, se kur ke lojtarë nuk të duhen menaxherët fare. Duhet të kalojnë së paku edhe 10 vjet që Kosova të shesë futbollistë jashtë, nëse fillojnë të ndryshojnë gjërat tash, se përndryshe kjo mund të zgjasë edhe 20 vjet”, tha Maxhuni.