Karateistët më të mirë të Kosovës gjatë kësaj fundjave do të kërkojnë medalje në njërin prej turneve më të fortë ndërkombëtarë “Swiss Open”, i cili mbahet në Zvicër. Federata e Karatesë e Kosovës ka bërë të ditur se në këtë turne Kosova pritet të përfaqësohet me 15 garues, në të gjitha konkurrencat, duke filluar nga kadetët e deri te seniorët.

Ekspeditës kosovare do t’i prijë seleksionuesi i të rinjve të Kosovës dhe ish-kampioni evropian, Afrim Latifi.

“Përfaqësuesja e Kosovës në karate nesër do të udhëtojë për në Cyrih, ku do të marrë pjesë në turneun e hapur ndërkombëtar të karatesë. Ky aktivitet shquhet për konkurrencën e fortë dhe pjesëmarrjen masive të shteteve evropiane. Përveç të gjitha klubeve të Zvicrës, në këtë turne do të marrin pjesë edhe 27 shtete me rreth 1285 garues. Kosova në këtë turne do të përfaqësohet me garuesit më të mirë”, ka bërë të ditur nëpërmjet një njoftimi FKK-ja.

Përveç Latifit pjesë e ekipit të Kosovës do të jenë edhe Hekuran Sojeva (kadet), Orges Arifi dhe Gresa Hyseni (juniorë), Herolind Nishevci, Alvin Karaqi, Agon Agani, Shkumbin Maksutaj, Liridon Fejzullahu, Rreze Shatri, Gentiana Karpuzi, Luljeta Shala, Jetmir Rexhepi dhe Velerda Agani (seniorë). Pjesë e ekspeditës do të jenë edhe përzgjedhësi Ylber Syla, gjyqtari Safet Ramadani dhe presidenti i FKK-së, Fadil Arifi.

Kjo është paraqitja e dytë për karateistët kosovarë për këtë vit, pas Austrisë, ku ata ishin stolisur me disa medalje.