Adoleshentët e sotëm jetojnë gjithmonë e më shumë të lidhur me internetin dhe mjetet teknologjike. Gjithnjë e më shumë adoleshentë zënë çdo sekondë të kohës së tyre zgjuar, duke përdorur mjete të ndryshme elektronike dhe njëherësh duke përdorur edhe fjalë nga më të ndryshmet të cilat i konsiderojnë si fjalë të trendit të ri.

Sipas Hana Dautit me kalimin e kohës edhe fjalori i tinejxherëve është pasuruar me fjalë të shumta me të cilat kuptohen vetëm mosha e tyre.

“Çdo ditë e më shumë po dëgjojë fjalë të reja nga të rinjtë, ku në një farë mënyre edhe unë i përdorë me shoqërinë time sepse në fakt edhe të imponohen. Mirëpo unë këtë e shoh si një plus, sepse me këtë po arrijnë që rinia jonë të depërtojë më lart dhe të ketë fjalorin e vet. Janë disa fjalë p.sh. ‘lofe’, ‘tipko’, e shumë të tjera që thjesht më pëlqejnë edhe mua, mirëpo ka shumë prej tyre që nuk i pëlqej dhe këto i përdor më shumë gjinia mashkullore”, ka thënë ajo.

Në të vërtetë është parë se këta fëmijë që janë gjithë kohës ‘online’, janë më të hapur, madje edhe koeficientin e inteligjencës e kanë më të lartë se ata të brezit paraardhës. Në njëfarë mënyre mund të thuhet se adoleshentët e këtyre viteve kanë zbuluar artin e të kudondodhurit, d.m.th. e kanë trupin në një vend dhe mendjen gjithandej.

Sigurisht që nëse kjo shndërrohet në ndjenjën kur e ndien veten të gjithëpushtetshëm, atëherë bëhet e rrezikshme. Në të kundërt është thjesht një demonstrim aftësish. Me siguri që ky është një ndryshim epokal. Sipas Besiana Jasharit gjuha shqipe nuk është masakruar por janë vetë njerëzit që janë masakruar duke keqpërdorur gjuhën e tyre.

“Populli i cili ka kënaqësinë të shprehet në gjuhë të huaja, janë vetëm shqiptarët dhe në fakt se kuptoj se ku është kënaqësia e shprehjes në një gjuhë tjetër. Unë nuk jam kundër atyre që përdorin fjalë shqipe të cilat i krijojnë vetë adoleshentët, por jam kundër atyre që përdorin fjalë në gjuhë të tjera, p.sh, fjalën ‘Ok’ që e përdor thuajse çdo i dyti person në vendin tonë”, shton ajo.

Fjalët që fluturojnë natyrshëm nga të rinjtë e shumtë, tashmë fare pak u ngjajnë edhe batutave më interesante të paraardhësve të tyre. Ardit Rexhepi është njëri nga të shumtët që përdorë fjalë të ndryshme me shokët e tij, mirëpo ai mendon se çdo fjalë e re e përdorur në shoqëri vjen në hap me kohën.

“Vet koha e bënë të veten, të rinjtë tani përdorin fjalë nga më të ndryshmet të cilat disa më të vjetër edhe nuk i kuptojnë. Mirëpo kjo besoj se nuk shkakton ndonjë pasojë jo të mirë tek të rinjtë, sepse vet koha e adoleshencës është e atillë që të shtynë të jesh me ‘in’ nga të tjerët apo thjeshtë të dallohesh nga të tjerët”, thekson ai.

Shoqëria shqiptare akoma nuk i ka të kristalizuara qartë shtresat e saj dhe për këtë arsye edhe lindja apo zhdukja e zhargoneve nuk do të sjellë probleme për gjuhën në vetvete. Por gjithsesi, tani është e kotë të mendosh se procesi i zhvillimit të gjuhës së adoleshentëve pas pak do të ndalet. Ky proces sapo ka nisur. Ndonëse ka pasur edhe ai evolucionin e vet në këto pak dekada që ka hyrë në përdorim.