Një politikane australiane e ka mbrojtur apelin e saj kontrovers që imigrantët e rinj të mësohen të vënë parfum, duke thënë se komentet e saj për vetëdijesim higjienik janë keqinterpretuar.

Teresa Gambaro, deputete konservatore në Parlamentin australian, e cila flet në emër të opozitës për çështje civile, ka nxitur reagim publik pasi ka sugjeruar se imigrantët që shkojnë në Australi me viza pune duhet të mësohen për normat sociale.

Qitja e parfumit dhe qëndrimi i durueshëm në radhë pa shtyrje janë disa prej çështjeve që ajo i ka përmendur si të rëndësishme.

“Pa dashur të fyej askënd, flas për higjienën dhe atë që është normë e pranueshme në këtë vend kur punon afër me kolegë të tjerë”, ka thënë Gambaro për gazetën “The Australian”.

“Nganjëherë, për këto gjëra s’flitet, sepse njerëzit i marrin fyese, por nëse njerëzit e kanë të vështirë të gjejnë punë, për shembull, kjo mund të ketë lidhje me paraqitjen e tyre dhe këto gjëra duhet të merren parasysh”, ka shtuar ajo.

Komentet e saj janë kritikuar si “bizare” nga ministri i Imigrimeve i vendit, Chris Bowen, i cili ka thënë se “ato mund të priteshin më 1952, e jo më 2012”. (The Daily Telegraph)