Mimoza 1.

Kur u përmend emri i Mimoza Kusarit si kandidate e AKR-së për kryetare të Gjakovës, plot njerëz mbetën t’habitun. E panë si diçka të re, jo vetëm për nga mosha, por edhe si ide të re, koncept të ri. Diçka që s’kishte ndodh’ ma herët as në Gjakovë e në ndonjë qytet tjetër të vendit. Sa mirë, ishin fjalët që thuheshin kudo nëpër takime, ndeja, kafiteri e sheshe, në javën kur u ba publike kandidatura e saj. Çikë e re në moshë, me shkollim në Amerikë, me plotë ide të reja e kreative për qytetin e saj të lindjes, me një biznesmen të fort prapa saj. Projektet e prezantuar nga vet ajo në “Çarshinë e Jupave”, midis t’Gjakovës, patën lan’ pa mend mijëra gjakovarë, të cilët e votuan më 15 nëntor të vitit të kaluar. Mbase ishte befasia më e këndshme e zgjedhjeve të nëntorit bashkë me kryetarin e ri të Hanit të Elezit, Rufki Sumën. Ajo arriti një rezultate të jashtëzakonshëm, ku mori gjysmën e votave të gjakovarëve, bashkëqytetarë të saj, që dolën atë të diele nëntori n’zgjedhje. Por ajo vetë u zhgënjye me rezultatin final të KQZ-së , që e shpalli fitues kryetarin aktual të Gjakovës, Pal Lekajn e AAK’së, për të cilin, sic thuhet, ka pasur mbështetjen e fshehtë të kryetarit të Degës së LDK në Gjakovë, Astrit Haraçia. Rezultati ishte rrënues edhe për vet LDK-në, humbje kjo e kalkuluar sipas shumë njerëzve. Mirëpo, humbja e Mimozës në këto zgjedhje bëri që shumë qytetarë ta mbështesin atë në ankesat e saj për parregullsi dhe manipulime të procesit zgjedhor në komunën që ajo pati kandiduar. Të gjithë ishin me të që në ditët e para mas shpalljes së rezultatit. Mijëra qytetarë të Gjakovës u dëshpëruan që ajo nuk arriti të siguronte votat e mjaftueshme që të bëhej kryetare e tyre. Madje, edhe n’Prishtinë ajo kishte marrë mijëra vota të rinisë, të cilët ditën e zgjedhjeve kishin shprehur dëshirë të jenë qytetarë me të drejtë vote n’Gjakovë, me votu për Mimozën - shpresën e Gjakovës, siç filloi të quhej ajo.

Mimoza 2.

Por, çfarë bën tani Mimoza? Ajo mbështet kandidatin e PDK-së në Lipjan, Shukri Bujën?!!!

Mimozën e deshtëm sepse ishte antipod i Shukri Bujës, i politikanit të këtij lloji. Ishte shpresa se politikanja e re po fiton kundër t’vjetërve  (jo në aspektin e moshës, po të konceptit) Ishte shpresa se e reja, ma n’fund po ia nxen vendin të vjetrës.

E vërtetë, zgjedhjet në Gjakovë ishin të vështira dhe rezultati mbase është deformuar. Pra, ndoshta Mimoza ka fituar, por tradhtia e supozuar e LDK-së ia ka marrë këtë fitore prej dore. Duket e logjikshme, nëse merret e mirëqenë tradhtia e LDK-së, që Mimoza tani po hakmerret dhe kjo duke mbështetur Bujën në Lipjan, ajo në njëfarë mënyrë po merr hak n’LDK. Por, a ka të drejtë morale Mimoza me i tradhtue gjithë ata gjakovarë, kryesisht të rinj që e votuan duke shpresuar në të. Disa më kanë thanë se janë të dëshpëruar dhe se nuk po munden ta kuptojnë këtë gjest të sajin. A ka të drejtë ajo që t’i tradhëtojë mijëra, ndoshta dhjetëra mijëra simpatizantë të saj në qytetet tjera t’Kosovës , duke u rreshtuar pas një kandidati në Lipjan, në këtë rast, Shukri Bujës?!. A do të thotë që Mimoza dhe Shukri Buja kanë të përbashkëta? A do të thotë se Mimoza dhe Shukri Buja ndajnë të njëjtat vlera? Me daljen e saj publike në përkrahje të Bujës dhe fjalëve miradije për të, Mimoza na bëri me dije se kështu është! Dyshoj që gjithë ata gjakovarë që e votuan Mimozën, si dhe rreth 15 mijë fansat e saj në fejsbuk, do ta votonin Shukri Bujën për kryetar të Lipjanit  Ça bane Mimozë? Mua po më duket që Mimoza, ma shumë se LDK-së, i ka ba dam vetes.

Ça bane Mimozë?!