Pamje të reja nga Thethi, bomba molotov godet mjetet e Inspektoratit

Tensionet në Theth kanë arritur kulmin gjatë dy ditëve të fundit, pasi aksioni i nisur nga Inspektorati Kombëtar i Mbrojtjes së Territorit (IKMT) për prishjen e ndërtimeve pa leje është përshkallëzuar ndjeshëm.

Prej disa ditësh, me urdhër të kryeministrit Edi Rama, IKMT ka ndërhyrë në strukturat e ngritura nga banorë të zonës, të cilat konsiderohen të paligjshme.

Pamje të reja që kanë qarkulluar sot në media tregojnë momente të rënda, ku persona ende të paidentifikuar kanë hedhur bomba molotov në drejtim të mjeteve të IKMT-së.

Ngjarja ka shkaktuar panik tek forcat policore që ndodhen në vendngjarje për të mbështetur operacionin e prishjes së ndërtimeve.

Menjëherë pas incidentit, një numër i madh forcash të Policisë së Shtetit kanë rrethuar zonën për të identifikuar dhe arrestuar autorët e sulmit, ndërsa banorët e zonës kanë shprehur indinjatën për mënyrën se si po zbatohet vendimi për shembjet.