Sekuestrohen mallra të kontrabanduara në Ferizaj, vlera mbi 16 mijë euro

Policia e Kosovës ka sekuestruar një sasi të konsiderueshme mallrash të kontrabanduara pas një aksioni të realizuar në Ferizaj.

Sipas njoftimit nga Policia, më 5 maj 2026, Njësia e Task Forcës – DRK Jug, pas pranimit të informatave për një depo të dyshuar, ka ndërmarrë veprime operative dhe hetimore që kanë rezultuar me zbulimin dhe sekuestrimin e mallrave.

Gjatë hetimeve, policia ka identifikuar një person të dyshuar, mashkull kosovar, i cili dyshohet se e ka përdorur depon për vendosjen e mallrave të kontrabanduara, të cilat dyshohet se janë futur në Kosovë përmes rrugëve ilegale nga Maqedonia e Veriut.

Pas sigurimit të urdhrit verbal nga prokurori kompetent, është kryer kontroll në lokacionin e dyshuar, ku janë sekuestruar:

800.4 kilogramë duhan i përpunuar,

94 kilogramë mjaltë,

30.4 kilogramë ambalazh plastik,

178 kilogramë ambalazh letre,

një makinë për përpunim të duhanit,

një makinë për përpunim të ambalazhit,

si dhe një spërkatëse uji për trajtimin e duhanit.

Vlera e përafërt e mallrave të sekuestruara llogaritet rreth 16,500 euro, ndërsa shmangiet nga akciza dhe detyrimet doganore arrijnë në rreth 34,000 euro.

Pas përfundimit të veprimeve policore, mallrat janë dorëzuar në Dogana e Kosovës për procedura të mëtejshme. /Zëri