Të trofeshmit e Kosovës
Viti 2016 po shkon, por ai do të lërë gjurmë për disa klube sportive të Kosovës.
Ndeshje interesante dhe dramatike u zhvilluan në sporte të ndryshme, dikush festoi e dikush u zhgënjye.
E nisim me futbollin. Për të tretin vit me radhë, Feronikeli e dominoi sportin e luajtur me këmbë.
“Nikli” e fitoi prapë titullin e kampionit, përmes të cilit synonte të dilte në Evropë, por kriteret e paplotësuara e lanë jashtë Ligës së Kampionëve.
Për dallim nga kampionati, skuadrës nga Drenasi në garat tjera nuk i shkuan punët siç deshi, pasi Kupa e Kosovës i takoi FC Prishtinës, e cila në finale e mundi Dritën, ndërsa Bardhekaltrit u treguan të suksesshëm edhe në Superkupë, ku e mundën pikërisht kampionin, Feronikeli.
Në basketboll ka vazhduar dominimi i Sigal Prishtinës, e cila e mundi në finale Pejën. Prishtinasit e fituan edhe Kupën e Kosovës, ku e mundën po ashtu Pejën.
Në hendboll, Besa Famiglia ka qenë sërish e pakonkurrencë, duke e fituar titullin pa asnjë humbje.
Gjithashtu, pejanët e fituan edhe Kupën e Kosovës pasi e mundi në finale Kastriotin. /Zëri/
