Arbeloa e konfirmon se do të largohet nga Real Madrid
Trajneri i Real Madridit, Alvaro Arbeloa ka konfirmuar një sekret të hapur, duke bërë të ditur se do të largohet nga klubi pas ndeshjes së fundit të sezonit kundër Athletic Club të shtunën mbrëma. Interesant është fakti se Arbeloa pranoi se vendimmarrjet e tij nuk kanë qenë gjithmonë plotësisht të tijat, pasi ka vendosur klubin mbi gjithçka tjetër.
E ardhmja e Arbeloas ka qenë një nga temat kryesore të diskutimit, me Jose Mourinho që pritet ta zëvendësojë javën e ardhshme, në varësi të asaj nëse presidenti Florentino Perez do të përballet apo jo me sfidë në zgjedhje.
“Shpresoj që të jetë vetëm një ‘shihemi përsëri’. Gjithmonë e kam konsideruar Real Madridin si shtëpinë time. Kam qenë me Real Madridin për 20 vite; është shtëpia ime. Kjo është ndeshja ime e fundit këtë sezon dhe nuk e di nëse do të jetë e fundit e karrierës sime si trajner i Real Madridit – nuk e dimë kurrë. Do të përpiqem ta shijoj dhe jam i fokusuar te fitorja”, deklaroi ai, duke konfirmuar më pas largimin.
Një tjetër temë e rëndësishme ishte marrëdhënia e tij me lojtarët, pasi gjatë katër muajve në krye të skuadrës pati disa përplasje që u bënë publike. Arbeloa tha se nuk ka asnjë mllef ndaj tyre, por zbuloi se vendimmarrja e tij është ndikuar nga interesi i klubit.
“Jam shumë mirënjohës për gjithçka kemi kaluar së bashku. E kuptoj që në moshën 25-vjeçare nuk mund të kesh të njëjtën marrëdhënie me të gjithë. Kemi pasur mosmarrëveshje, kjo është normale. I kemi zgjidhur në mënyrën më të mirë të mundshme. Gjithmonë kemi treguar respekt ndaj njëri-tjetrit”, u shpreh Arbeloa.
Ai shtoi se gjatë muajve të fundit ka menduar më shumë për Real Madridin sesa për veten.
“Kam menduar më shumë për Real Madridin sesa për veten time këta muaj, por kam bërë atë që ishte më e mira për klubin. Nuk kam qenë i njëjti person që kam qenë për vite me radhë në akademi. Në një klub tjetër do të kishte qenë ndryshe, por kjo ishte ajo që duhej të bëja. Nuk ka vend për pendim.”
Më tej, Arbeloa pranoi se nuk ka mundur t’i bëjë gjërat plotësisht sipas mënyrës së tij.
“Shumë gjëra do t’i kisha bërë ndryshe”, tha ai me të qeshur. “E di gjendjen e skuadrës kur erdha dhe sfidat që kam pasur. Nëse do ta kisha nisur nga fillimi, do të ishte ndryshe. Por jam përpjekur të bëj më të mirën e mundshme – jo sipas mënyrës sime, por sipas asaj që ishte më e mira për klubin.”
Kur u pyet drejtpërdrejt nëse vendimet e tij janë ndikuar nga drejtuesit e klubit, Arbeloa u tërhoq nga një deklaratë më e fortë.
“Nuk po shkoj në atë drejtim dhe nuk dua të interpretohet kështu. Askush nga klubi nuk ndërhyri, thjesht duhej të mendoja për klubin para vetes.”
Në konferencën e tij të fundit para ndeshjes, Arbeloa u shfaq disi emocional.
“Pothuajse të gjithë lojtarët më kanë ndihmuar të rritem si trajner dhe si person. Kam pasur marrëdhënie me secilin prej tyre. Ndonjëherë kemi qenë dakord, ndonjëherë jo. E mira është se unë kam qenë në vendin e tyre dhe i kuptoj.”
Sipas raportimeve, Mourinho dëshiron të sjellë në stafin e tij teknik një ish-lojtar të Real Madridit, dhe ishte përfolur se Arbeloa mund të mbetej pjesë e stafit. Megjithatë, spanjolli e hodhi poshtë këtë mundësi.
“Mourinho ka një staf fantastik dhe nëse vjen, do të vijë me njerëzit e tij, ashtu siç duhet të ndodhë. Nuk ka absolutisht asnjë mundësi që të jem pjesë e stafit të tij. Këta katër muaj kam menduar vetëm për Real Madridin; tani është koha të mendoj për veten time. Ndihem gati për sfida të reja.”
Arbeloa do ta drejtojë për herë të fundit Real Madridin të shtunën në orën 21:00 në Santiago Bernabeu kundër Athletic Club. Në atë ndeshje stadiumi do t’i bëjë homazh edhe Dani Carvajal në paraqitjen e tij të fundit.
