Pse plasi “konflikti” mes Shalës e Zybës në Kuvend?
Një situatë paska e tensionuar ka ngjarë sot në Kuvendin e Kosovës, ku po diskutohej për të gjeturat e Departamentit Amerikan të Shtetit për vitin 2023, kjo pasi deputetit të Partisë Demokratike të Kosovës, Ferat Shala, nuk po i jepej fjala nga kryesuesja e seancës, Saranda Bogujevci.
Lidhur me këtë ngjarje, Shala për Klan Kosova tha se po shkelet rregullorja e Kuvendit, dhe se nuk është hera e parë që ndodh një gjë e tillë.
“Në një seancë krejt normale, zyrtare, edhe pse jam lajmëruar më kohë për fjalë, më është mohuar e drejta e fjalës dhe jam anashkaluar. Pastaj jam përmendur po ashtu nga ministri i financave dhe unë kam kërkuar që ta marr fjalën sepse me takon me rregullore që të flas”.
“Mazhoranca është në shqetësim të madh për shkak të raportit të DASH-it, dhe frika nga fjala e lirë, nga argumentet dhe nga e vërteta për shkallën e lartë të korrupsionit në qeveri, si duket ata i ka vënë në panik dhe me çdo çmim sot kanë insistuar që të mohojnë fjalën time dhe në njëfarë forme sot ia kanë arritur që të mohojnë fjalën time në Kuvendin e Kosovës”, deklaroi Shala.
