Serbja e dyshuar për spiunazh i dërgonte mesazhe edhe njërit nga të arrestuarit për sulmin në Banjskë
Media kroate Index.hr raporton se piloti i Forcave të Armatosura Kroate, J.I. (54), dhe partnerja e tij, A.M. (46), shtetase e Serbisë, janë vendosur në paraburgim për të mos penguar hetimin, pasi Prokuroria e Qarkut në Split ka hapur hetim ndaj tyre për spiunazh.
Piloti akuzohet për një formë të rëndë të spiunazhit, për të cilin parashikohet dënim deri në 10 vjet burg, sepse dyshohet se ka dhënë informata të fshehta. Partnerja e tij rrezikon nga një deri në pesë vjet burg, pasi dyshohet për grumbullim dhe transmetim të informacionit sekret. Paraburgimi i saj është vendosur jo vetëm për rrezikun e ndikimit mbi dëshmitarët, por edhe për rrezikun e arratisjes, ndërsa gjykata ka vlerësuar se nuk ka rrezik përsëritjeje të krimit, pasi piloti nuk është më pjesë e misionit në Kosovë.
Media kroate raporton se sipas hetimeve, piloti i ka dhënë partneres së tij informacione mbi lëvizjet dhe pozicionet e forcave KFOR, të cilat ajo i ka transmetuar përmes aplikacioneve të koduara. Ai ka pranuar se dyshonte se ajo mund të tregtonte informacion sekret, por në mbrojtje të tij ka deklaruar se partnerja i ka dërguar vetëm të dhëna për motin të nevojshme për fluturim dhe se ajo është viktimë kolaterale.
Çifti është njohur në Kosovë në vitin 2016, kur ai ishte pjesëtar i kontingjentit kroat në KFOR, ndërsa ajo punonte si përkthyese për misionin EULEX. Lidhja e tyre ka vazhduar me ndërprerje për nëntë vjet, dhe A.M. ka udhëtuar shpesh në Kroaci, ku u arrestua.
Sipas medias kroate Index.hr, “Hetuesit kanë gjetur mesazhe problematike në telefonat e tyre, duke përfshirë një ngjarje nga 25 dhjetori 2022, kur në Zubin Potok u sulmuan pjesëtarë të KFOR-it. A.M. i kishte shkruar një mikut të saj nga fëmijëria, Vladimir Radivojevië, i njohur si Mami, i cili konsiderohet pjesë e strukturave serbe në veri të Kosovës dhe është lidhur me sulmin terrorist në Banjskë në 2023. Në mesazhe, A.M. i kishte shkruar: “Duhet ta rregulloni sulmin ndaj KFOR-it si të dini dhe mundeni”, ndërsa piloti i kishte kthyer: “Natën e kaluar e shkatërruat vërtet””.
Gjithashtu, A.M. ka deklaruar se ka punuar për shërbimin sekret gjerman BND, i cili merret me mbledhjen dhe analizën e informacionit inteligjent nga jashtë vendit. Gjermania ka qenë një nga vendet kryesore në misionin KFOR dhe një nga donatorët kryesorë të Kosovës.
Hetimi vazhdon për të zbardhur detaje të mëtejshme rreth këtyre veprimeve, ndërsa çifti mbetet në paraburgim.
Lidhur me këtë ka reaguar edhe presidenti kroat Zoran Milanoviq, i cili ka shprehur mbështetjen e tij për të gjitha institucionet e Republikës së Kroacisë. /tëvë1
