Murati: Në vitin 2021 nuk kishim opsion tjetër për nënkryetar nga Lista Serbe, tani e kemi Rashiqin

Ministri në detyrë i Financave, Hekuran Murati, ka thënë sot se votimi i Nenad Rashiqit si nënkryetar i Kuvendit nga minoritetet serbe nuk e shkel Kushtetutën.

Murati ka kritikuar PDK-në, LDK-në dhe AAK-në se nuk po kanë guxim politik për ta votuar Rashiqin, ndërsa ka shpjeguar që votimi për të nuk e shkel Kushtetutën, pasi sipas tij, nuk ekziston ekskluziviteti për një parti serbe për ta zgjedhur nënkryetarin.

Ai sqaroi se në vitin 2021 kanë votuar për nënkryetar nga Lista Serbe, pasi në atë kohë nuk kishte opsione të tjera, pasi 10 vendet e rezervuara i kishte fituar Lista Serbe, ndërsa këtë vit janë 9, transmeton Zeri.info.

Shkrimi i plotë i Muratit:

Refuzimi i deputetëve nga PDK/LDK/AAK për ta votuar si nënkryetar një deputet që NUK është i Listës Serbe, nënkupton se PDK/LDK/AAK po e ruajnë pozitën e nënkryetarit për dikë TË Listës Serbe.

Vetëm se duke mos pasur guximin politik ta votojnë qysh tash dikë të Listës Serbe, po presin derisa çështja të shkojë në Gjykatë Kushtetuese (për këtë edhe u bënë kinse e përjashtuan nga AAK deputetin Adem Hoxha, që ai t’ia sigurojë nënshkrimin e 10-të Listës Serbe), me shpresën që Gjykata Kushtetuese i nxjerr nga situata, që pastaj të thonë se “s’patëm qare pa votu se na detyroi Gjykata Kushtetuese”.

- A shkelet Kushtetuta nëse zgjedhet Nenad Rashiq?

Pretendimi i opozitës se gjoja vetëm një deputet i Listës Serbe mund të zgjidhet nënkryetar i Kuvendit se përndryshe po u shkelka Kushtetuta, është i pavërtetë.

Kushtetuta e thotë që nënkryetari duhet të jetë nga radhët e deputetëve që përfaqësojnë komunitetin jo-shumicë serb, kaq. Pra nuk ka ekskluzivitet apo monopol Lista Serbe në këtë rast.

- Pse herën e kaluar në vitin 2021 u zgjodh një deputet i Listës Serbe për nënkryetar, ndërsa tash nuk bën?

Në vitin 2021, që të gjithë 10 deputetët që përfaqësojnë komunitetin jo-shumicë serb në Kuvend ishin nga Lista Serbe, pra nuk kishte opsion tjetër. Kurse tash në vitin 2025 janë 9 deputetë nga Lista Serbe dhe 1 deputet që NUK është i Listës Serbe, pra ka opsion tjetër.

Për më tepër, ndërmjet këtyre dy kohëve e kemi edhe sulmin terrorist në Banjskë të udhëhequr nga terroristi Milan Radoiçiq, i cili ende sillet i lirë në Serbi dhe vazhdon ta dirigjojë Listën Serbe. Ky është argumenti i cili do duhej të bindte secilin deputet të Kuvendit që të mos e votojnë askënd nga Lista Serbe për nënkryetar të Kuvendit.