Vdes një i burgosur në Spitalin e Pejës

Një i burgosur ka vdekur në Spitalin e Pejës, kanë bërë të ditur Shërbimi Korrektues i Kosovës dhe Departamenti Shëndetësor i Burgjeve.

Siç thuhet në një njoftim, T.Zh. për shumë vite me radhë ishte trajtuar në Qendrën Klinike Universitare të Kosovës, si dhe në Spitalin Rajonal të Pejës.

“Gjatë gjithë kohës i burgosuri është trajtuar në kuadër të SHSKUK-së me mbi 100 vizita dhe hospitalizime që nga viti 2021. Si rrjedhojë, edhe gjatë qëndrimit në burg, pothuajse tërë kohën ka qenë i trajtuar në stacionarin e burgut. Për shkak të gjendjes së rënduar shëndetësore, SHKK-ja kishte bërë kërkesë edhe për pezullimin e dënimit të tij, për çka ishte refuzuar nga gjykata”, thuhet në njoftim.

Po ashtu bëhet e ditur se organet kompetente janë duke zhvilluar procedurat ligjore, ndërsa autopsia do të përcaktojë shkakun e vdekjes.