Ministrat e Jashtëm të Procesit për Bashkëpunim të Evropës Juglindore shënojnë 30 vjet bashkëpunim në takimin e New Yorkut
Ministrat e Punëve të Jashtme të Procesit të Bashkëpunimit të Evropës Juglindore (SEECP) u mblodhën për takimin vjetor, i zhvilluar në kuadër të Sesionit të Asamblesë së Përgjithshme të Kombeve të Bashkuara në Nju Jork dje, i bashkorganizuar nga Këshilli i Bashkëpunimit Rajonal (RCC) dhe Kryesimi i SEECP-së nga Bullgaria.
Takimi, bashkëkryesuar nga sekretari i përgjithshëm i RCC-së, Amer Kapetanoviq, dhe ministri i Punëve të Jashtme të Bullgarisë, Georg Georgiev, shënoi 30-vjetorin e SEECP-së nën moton “30 Vite të SEECP: Drejt së ardhmes përmes stabilitetit rajonal, sigurisë dhe transformimit të qëndrueshëm”. Agjenda e diskutimit në Nju Jork pasqyroi këtë fokus drejt së ardhmes, me synimin për të përkthyer prioritetet e përbashkëta në arritje konkrete rajonale.
RCC-ja theksoi evolimin tredekadësh të SEECP në forumin politik më gjithëpërfshirës të rajonit dhe përsëriti mbështetjen e tij si krahu operacional i procesit, duke ndërtuar ura mes dialogut dhe zbatimit konkret përmes tri shtyllave: smart (digjital dhe inovativ), aftësimi (i orientuar drejt njerëzve) dhe qëndrueshmëria (tranzicioni i gjelbër).
“Pas tridhjetë vitesh, SEECP mbetet platforma jonë politike më përfaqësuese, dhe RCC është këtu për ta kthyer frymën e bashkëpunimit në arritje të prekshme për njerëzit. Kjo do të thotë përforcim i zbatimit praktik: ndërlidhje më të mençura, aftësi më të forta dhe rritje më të gjelbërt, të mbështetura nga besimi dhe siguria. Qytetarët tanë duan prova, jo premtime. Me unitetin e treguar sot në Nju Jork, jam i bindur se mund të shndërrojmë ambicien në veprim dhe ta bëjmë dekadën e ardhshme të bashkëpunimit rajonal me më ndikim deri më tani”, deklaroi sekretari i përgjithshëm i RCC-së, Amer Kapetanoviq.
Ministrat e SEECP-së përgëzuan punën e RCC-së dhe riafirmuan mbështetjen e tyre të plotë për agjendat rajonale në vazhdim. Për më tepër, ata shkëmbyen mendime për forcimin e stabilitetit dhe sigurisë rajonale, përshpejtimin e transformimit të gjelbër dhe digjital, si dhe kthimin e prioriteteve të përbashkëta në arritje konkrete për qytetarët, fushat e përafruara me Strategjinë e re dhe Programin e Punës të RCC 2026–2028, ndërtuar mbi tri shtyllat: I Mençur (Smart), I Aftë dhe I Qëndrueshëm.
Gjatë vizitës së tij në Shtetet e Bashkuara, më herët këtë javë në Nju Jork, Sekretari i Përgjithshëm i RCC-së, Amer Kapetanoviq, nënshkroi një Letër Bashkëpunimi me Ivana Zivkoviq, ndihmëssekretare e përgjithshme e OKB-së dhe drejtore rajonale e PNUD-së për Europën dhe CIS, duke përcaktuar një kornizë për forcimin dhe strukturimin e bashkëpunimit në mbështetje të qeverisjes, zhvillimit të qëndrueshëm dhe rezistencës në gjithë Evropën Juglindore. Ai gjithashtu mori pjesë në takimin e Ministrave të Jashtëm të Nismës Adriatiko-Joniane. Vizita e tij në SHBA do të vazhdojë në Uashington.
