Kurti: Veprimet në veri ishin të domosdoshme, ia kanë vlejtur [video]

Kryeministri në detyrë i Kosovës, Albin Kurti, ka deklaruar se veprimet e institucioneve të sigurisë në veri të vendit kanë qenë “parimore, ligjore dhe të domosdoshme” për mbrojtjen e integritetit territorial dhe sigurisë publike.

Kurti, përmes një postimi në rrjetin social Facebook, ka thënë se rezultatet e këtyre veprimeve kanë qenë të mëdha, duke theksuar mbylljen e 29 nga 37 rrugëve ilegale, eliminimin e strukturave paralele të Serbisë, si dhe largimin e “kriminelëve të mëdhenj” nga zona.

Sipas tij, veprimet kanë bërë që shteti të vendosë rend dhe ligj në 16 për qind të territorit, duke e rikthyer kontrollin institucional.

“Pavarësisht kritikave, ajo që Kosova ka fituar si shtet është shumë më e madhe dhe më e vlefshme sesa çdo gjë tjetër”, shkroi Kurti, duke theksuar se ndërhyrjet kanë qenë të nevojshme dhe efektive. /Zëri