Uji në Miradi të Poshtme nuk rekomandohet për pije pas vërshimeve, njofton KRU “Prishtina”

Kompania Rajonale e Ujësjellësit Prishtina ka njoftuar se, si pasojë e vërshimeve të fundit dhe monitorimit të vazhdueshëm të cilësisë së ujit 24 orë në ditë, është konstatuar se uji në fshatin Miradi e Poshtme aktualisht nuk është i rekomandueshëm për pije dhe përgatitje të ushqimit.

Sipas njoftimit zyrtar, deri në një vendim të ri, banorëve u këshillohet që ujin ta përdorin vetëm për nevoja higjienike, si larja dhe pastrimi, duke shmangur çdo përdorim për konsum njerëzor.

KRU “Prishtina” bën të ditur se ekipet përgjegjëse po e përcjellin situatën në mënyrë të vazhdueshme dhe po ndërmarrin të gjitha masat e nevojshme për përmirësimin e cilësisë së ujit. Kompania thekson se qytetarët do të njoftohen menjëherë sapo analizat të konfirmojnë se uji është i sigurt për përdorim për pije.