Dega e LDK-së në Zvicër përkujton veprimtarin Ali Sadriun
Dega e tretë e Lidhjes Demokratike të Kosovës në Zvicër ka organizuar një përkujtim të veçantë për veprimtarin e shquar të Çështjes Kombëtare dhe të LDK-së, Ali Shaban Sadriu, i cili ndërroi jetë kohët e fundit, duke lënë pas një trashëgimi të pasur dhe një shembull të shqiptarit të përkushtuar.
Dega ka theksuar se Ali Sadriu lindi në një familje me traditë të fuqishme atdhetare, pasardhës i Hagji Hasan Sadriut dhe Ismajl Goranit, dhe vazhdoi rrugën e gjyshit Hasni dhe patriotit Smajl Baftiu – Gorani. Që në moshë të hershme, ai u angazhua në aktivitetin politik dhe shoqëror, duke u bërë pjesë aktive e LDK-së dhe duke kultivuar me dinjitet vlerat kombëtare, nderin dhe traditën e familjes.
"Gjatë jetës së tij, Sadriu shërbeu si kryetar i degës së LDK-së në Shtime, ku dha kontribut të madh në organizimin e strukturave lokale të partisë dhe promovimin e vizionit demokratik të Dr. Ibrahim Rugovës. Ai njihej për qëndrimin e palëkundur ndaj presioneve politike dhe ndikimeve të jashtme, duke ruajtur integritetin dhe emrin e familjes Gorani të Davidovcit në kujtesën e komunitetit", ka shkruar Dega e LDK në Zvicër.
Tutje thuhet se, përveç angazhimit politik, Ali Sadriu ishte i njohur për respektin që tregonte ndaj bashkëpunëtorëve, shokëve të rrugëtimit dhe familjeve tradicionale të zonës. Ai vlerësonte kontributin e secilit dhe e promovonte bashkëpunimin për zhvillimin e komunitetit dhe të vendit. Trashëgimia e tij është e lidhur ngushtë me shembullin e patriotizmit të palëkundur dhe përkushtimin ndaj shqiptarizmit.
Në përkujtim, Ali Shaban Sadriu u kujtua nga shoku i tij i shkollës dhe rrugëtimit të përbashkët, Ibrahim Syla, nga Raçaku, i cili e vlerësoi për punën e tij të palodhshme, për integritetin dhe kontributin e madh në LDK dhe në komunitetin shqiptar në Zvicër.
Dega e tretë e LDK-së në Zvicër theksoi rëndësinë e trashëgimisë së Sadriut, duke e cilësuar si një shembull të jetës patriotike dhe të përkushtimit të pakursyer për Çështjen Kombëtare. Familja dhe komuniteti e kujtojnë me krenari dhe respekt, ndërsa Zoti e pranoftë shpirtin e tij mes të drejtëve.
Ali Shaban Sadriu mbetet një figurë e shquar për LDK-në, një udhëheqës i palëkundur dhe një patriot i pavdekshëm, i cili la një gjurmë të qartë në historinë e partisë dhe të kombit shqiptar.
