SHSKUK: Gjatë vitit 2025 u kryen mbi 400 operime kardiokirurgjike
Gjatë 2025-s në Shërbimin Klinik të Kardiokirurgjisë në QKUK janë kryer mbi 400 operime kardiokirurgjike.
Nga SHSKUK-ja kanë treguar se po në 2025-n është kryer me sukses edhe operacioni i harkut të aortës me teknikën Frozen Elephant Trunk.
“Shërbimi Klinik i Kardiokirurgjisë në Qendrën Klinike Universitare të Kosovës (QKUK) gjatë vitit 2025 ka shënuar një rekord me realizimin e mbi 400 operimeve kardiokirurgjike, duke përfshirë raste selektive dhe emergjente, në përputhje me standardet bashkëkohore të kardiokirurgjisë. Gjatë këtij viti janë kryer me sukses ndërhyrje të ndërlikuara kardiokirurgjike, përfshirë për herë të parë në Kosovë operacioni i harkut të aortës me teknikën Frozen Elephant Trunk (FET) si dhe një rast tjetër me David procedurë, në bashkëpunim me qendra të njohura evropiane. Po ashtu, në muajt maj dhe tetor, në bashkëpunim me kardiokirurgë pediatrikë ndërkombëtarë, janë realizuar 19 operime te fëmijët me defekte të lindura të zemrës”, thuhet në njoftim.
Më tej u thënë se: “Shërbimi Klinik i Kardiokirurgjisë vazhdon të shënojë rritje të cilësisë së shërbimeve dhe besimit nga pacientët, duke u angazhuar për rezultate edhe më të mira në vitet në vijim. Stafi u bën thirrje qytetarëve të Republikës së Kosovës që për trajtimin e sëmundjeve të zemrës të drejtohen në QKUK, pa pasur nevojë për trajtim jashtë vendit”.
