Osmani: Anëtarësimi në Bordin e Paqes do të dërgohet në Kuvend për ratifikim

Presidentja e Kosovës, Vjosa Osmani, ka nënshkruar sot në Davos Kartën e Bordit të Paqes si anëtare themeluese, e barabartë dhe me të drejta të plota, krah për krah me Shtetet e Bashkuara të Amerikës.

Në një postim në rrjetin social, Osmani theksoi se anëtarësimi në organizata ndërkombëtare të paqes, të udhëhequra nga aleati strategjik i Kosovës, fuqizon sovranitetin dhe pozicionin ndërkombëtar të vendit.

“Kur Amerika udhëheq, paqja është gjithmonë më e sigurt!”, shkroi Presidentja.

Osmani shtoi se kjo marrëveshje historike do t’i dërgohet Kuvendit të Kosovës për ratifikim, në përputhje me Kushtetutën, për të marrë miratimin final nga përfaqësuesit e popullit, transmeton Zeri.info.

“Faleminderit presidentit Trump për lidershipin e tij dhe për ftesën që ta përfaqësoj Republikën e Kosovës në këtë moment historik. Kosova do të jetë në shërbim të paqes, sot e përherë!”, tha presidentja Osmani. /Zëri