VoRAE me thirrje për donacion të pajisjeve teknologjike për studentët nga komunitetet Rom, Ashkali dhe Egjiptian në Kosovë
Mungesa e pajisjeve teknologjike vazhdon të jetë një nga pengesat kryesore për arsimimin e të rinjve nga komunitetet Rom, Ashkali dhe Egjiptian në Kosovë.
Për shumë studentë ambiciozë, një laptop apo kompjuter nuk është luks, por mjeti bazik që ua mundëson vijimin e studimeve dhe qasjen në botën digjitale.
Sipas të dhënave të UNICEF-it, vetëm rreth 24 për qind e të rinjve nga këto komunitete e përfundojnë arsimin e mesëm të lartë, krahasuar me rreth 87 për qind në nivel kombëtar. Rënia e pjesëmarrjes në shkollë me rritjen e moshës dhe shkalla e lartë e braktisjes së arsimit lidhen ngushtë me faktorë socio-ekonomikë, përfshirë mungesën e qasjes në teknologji.
Pa një pajisje teknologjike, shumë studentë hasin vështirësi në ndjekjen e ligjëratave, realizimin e punimeve akademike, aplikimin për bursa apo përfshirjen në programe të praktikës profesionale. Në këto rrethana, arsimi shpesh mbetet një derë e mbyllur.
Në këtë kontekst, Organizata Zëri i Romëve, Ashkalinjve dhe Egjiptianëve në Kosovë (VoRAE) ka nisur një thirrje publike për donacion të pajisjeve teknologjike, me synimin që t’u ofrojë studentëve mjete konkrete për të vazhduar dhe përfunduar studimet e tyre.
Përmes programit “Mbështetje plotësuese për studime akademike”, VoRAE ofron mentorim, tutorim, trajnime digjitale dhe udhëzim për karrierë për studentët nga këto komunitete. Megjithatë, sigurimi i pajisjeve teknologjike për çdo student tejkalon kapacitetet financiare të një organizate jo-fitimprurëse, duke e bërë kontributin e donatorëve thelbësor për arritjen e rezultateve konkrete.
Çfarë mund të dhurohet?
VoRAE fton individë, biznese dhe institucione të dhurojnë:
• laptopë (prioritet),
• kompjuterë desktop me monitor,
• tableta.
Pajisjet mund të jenë të reja ose të përdorura, përderisa janë funksionale. Organizata kujdeset për kontrollin teknik, regjistrimin dhe shpërndarjen transparente të tyre te studentët në nevojë.
Sipas VoRAE-s, një pajisje e vetme mund të bëjë dallimin mes braktisjes së studimeve dhe diplomimit. “Një pajisje për dikë është thjesht teknologji e papërdorur, ndërsa për një student është qasje në arsim dhe një mundësi reale për një të ardhme më të mirë,” thuhet në thirrjen e organizatës.
Të interesuarit për të kontribuar mund të kontaktojnë VoRAE-n përmes adresave elektronike [email protected] dhe [email protected]. Pajisjet mund të dorëzohen personalisht ose të organizohet tërheqja e tyre nga organizata.
Për më shumë informacione rreth fushatës dhe mënyrës së dhurimit, qytetarët mund të vizitojnë faqen zyrtare të VoRAE-s.
