Policia e Kosovës realizon vizitën e parë në kufirin SHBA - Meksikë

Për herë të parë në historinë e saj, Policia e Kosovës ka realizuar një vizitë zyrtare në kufirin mes Shteteve të Bashkuara dhe Meksikës.

Policia ka njoftuar se më 23 janar, drejtori i përgjithshëm i Policisë së Kosovës, kolonel Gazmend Hoxha, i shoqëruar nga udhëheqës të lartë të Policisë, vizitoi Portin e Hyrjes Laredo për të ndjekur nga afër operacionet e sigurisë kufitare në kohë reale.

Vizita u organizua me mbështetjen e Ambasadës së SHBA-së në Prishtinë përmes programit DOJ-ICITAP dhe përfshiu bashkëpunimin me Doganat dhe Mbrojtjen Kufitare të SHBA-së. Delegacioni i Kosovës pati mundësinë të njihte nga afër procedurat operative, teknologjitë moderne dhe qasjet e koordinuara të zbatimit të ligjit që përdoren në një nga pikat më të ngarkuara të hyrjes në SHBA.

Gjatë vizitës, përfaqësuesit e Policisë së Kosovës ndoqën procedurat e inspektimit, metodat e kontrollit të bazuara në vlerësimin e rrezikut dhe përdorimin e teknologjisë për forcimin e sigurisë kufitare, duke ruajtur njëkohësisht lirinë e udhëtimit dhe tregtinë legjitime. Përvoja e fituar u vlerësua si shumë e dobishme dhe pritet të përdoret për përmirësimin e operacioneve kufitare në Kosovë.

Policia e Kosovës thekson se njohuritë dhe përvojat e marra do të kontribuojnë në ngritjen e kapaciteteve të sigurisë kufitare dhe në avancimin e standardeve përmes bashkëpunimit të vazhdueshëm me Ambasadën e SHBA-së. Kjo vizitë nënvizon partneritetin e fortë ndërmjet Kosovës dhe Shteteve të Bashkuara dhe pasqyron përkushtimin e përbashkët ndaj sigurisë, inovacionit dhe bashkëpunimit ndërkombëtar./Zëri