Haxhiu: Kërkesa e ZPS-së për dënim, akt padrejtësie

Ish-ministrja e Drejtësisë, Albulena Haxhiu, ka reaguar për kërkesën e Prokurorisë në Hagë për dënimin e ish krerëve të UÇK-së me nga 45 vjet. Ajo ka thënë se kjo është akt padrejtësie dhe fyerje ndaj viktimave shqiptare të luftës.

“Kërkesa e Prokurorisë për dënim me burg prej 45 vjetësh për secilin nga ish-krerët e Ushtrisë Çlirimtare të Kosovës, është një akt padrejtësie dhe një fyerje ndaj viktimave shqiptare të luftës. Kjo nuk ka të bëjë me përpjekje për drejtësi. Kjo është një orvatje prokuroriale për ndëshkim politik dhe selektiv ndaj një lufte të drejtë çlirimtare”.

Haxhiu ka thënë se Serbia nuk u përball kurrë me drejtësinë në mënyrë serioze, ndonëse janë dokumentuar krimet e kryera.

“Serbia ka kryer krime lufte të dokumentuara, vrasje, masakrime, përdhunime seksuale si armë lufte, dëbime masive të popullsisë etj. Këto krime janë të regjistruara dhe të dëshmuara nga bota mbarë. E megjithatë Serbia nuk u përball kurrë me drejtësinë në mënyrë serioze. Kriminelët e saj u ricikluan në pushtet, u amnistuan e u privilegjuan”.

Ajo shton se UÇK-ja po trajtohet sikur të ishte shkaku i luftës e jo përgjigjja ndaj terrorit shtetëror serb.

“Në vend të gjykimit të agresorit, fatkeqësisht u votua një mekanizëm që sot mundohet të na e kriminalizojë rezistencën e popullit. UÇK po trajtohet sikur të ishte shkaku i luftës, e jo përgjigjja ndaj terrorit shtetëror serb. Ky është shtrembërim i historisë. Të kërkosh aq vite burgim për drejtues e ushtarë të UÇK-së, është tendencë për të zhveshur Kosovën nga e drejta morale e çlirimit dhe tendencë për ta barazuar viktimën me xhelatin”.