Lushaku-Sadriu për draftbuxhetin 2026: Nuk përkon me realitetin
Shefja e Grupit Parlamentar të LDK-së, Jehona Lushaku-Sadriu, ka kritikuar Qeverinë rreth buxhetit 2026.
Gjatë seancës së jashtëzakonshme, deputetja tha se ky draftbuxhet i paraqitur para Kuvendit nuk përkon me realitetin dhe, sipas saj, i njëjti nuk është i përditësuar.
“Në rendin e gjërave do duhej ta kishim programin qeverisës menjëherë pas aprovimit të qeverisë, e pastaj ta kishim buxhetin e rishikuar këtu, se përndryshe del komplet e pakuptimtë që ne sot ta shohim duke u diskutuar një draftbuxhet, i cili nuk është i përditësuar dhe nuk përkon me realitetin, as me nevojat e qytetarëve, as nuk paraqet një hartë zhvillimore të vendit tonë, dhe as nuk i reflekton prioritetet tuaja si qeveri. Madje nuk e reflekton as përbërjen tuaj qeveritare”, tha Lushaku-Sadriu.
Sipas saj, kjo po ashtu anashkalon vendimet e Gjykatës Kushtetuese, nuk reflekton nevojat qytetare, si dhe sipas saj, nuk reflekton as paraqitjen reale të buxhetit të komunave.
