Haxhi Avdyli jep dorëheqje nga “Guxo”, pas sulmeve ndaj Vjosa Osmanit
Deputeti Haxhi Avdyli ka dhënë dorëheqje nga të gjitha pozitat që mban në listën “Guxo”.
Sipas tij, ky veprim është në shenjë proteste për sulmet e fushatën linçuese që po bëhen ndaj presidentes Vjosa Osmani, pas dekretit për shpërndaje të Kuvendit, raporton Zeri.info.
“Qëndrimin tim për procesin e fundit politik e kam thënë publikisht në mbledhjen GP të LVV-së në prani edhe të Kurtit e po ashtu edhe në kryesi të ‘Guxo’.
Ne disa, me respekt të ndërsjellë, jemi pajtuar që s’po pajtohemi me orientimin që po merrte shumica e Grupit tonë politik.
Por edhe pse ishte ky mospajtim politik i rrallë mes nesh, nuk do ta kisha menduar kurrë që do të pasonte kjo fushatë bazuar në linçim, fyerje, shpifje të ulëta e deri në kërcënime nga kolegë deputetë, politikanë, miq të mi të njohur e panjohur, nga mu ata që deri para pesë ditësh e quanin Vjosa Osmanin krenari të Kosovës”, thekson Avdyli.
Ai, ndër të tjera, shpreson të ndalet kjo gjuhë e urrejtjes, sepse është jonjerëzore dhe se debatet politike kanë për të vazhduar.
“Uroj dhe shpresoj që, për hir të Kosovës dhe të ardhmes së fëmijëve tanë, kjo dorëheqje e ime, si deputet në pesë mandate, tri mandate nga lista me LVV-në, të ju shërbej sado pak që të mendoni me kokë të ftohur, që të jetë apel nga një deputet që ka dhënë shumë për këtë 50% e 51%, që ta ndërroni strategjinë denigruese, ta ndalni gjuhën e urrejtjes dhe dhunës.
Mbani qëndrime politike, por aman shpërndani më shumë respekt e dashuri mesh nesh, sepse ajo është që na duhet.
Rrugët politike mund të na ndahen e mund të na bashkohen, por njerëzillëkun brenda nesh s’bën ta vrasim”, thuhet në postimin e Avdylit. /Zëri
