Nagavci: Vendimi i Kushtetueses thelbësor për stabilitetin institucional

Shefja e Grupit Parlamentar të Lëvizja Vetëvendosje, Arbërie Nagavci, ka mirëpritur vendosjen e masës së përkohshme nga Gjykata Kushtetuese e Kosovës ndaj dekretit të presidentes Vjosa Osmani për shpërndarjen e Kuvendi i Republikës së Kosovës.

Nagavci ka thënë se besojnë që kërkesa e tyre është e drejtë dhe se argumentet janë të qarta e të bazuara në Kushtetutë, duke shtuar se presin një trajtim profesional nga Gjykata dhe miratimin e kërkesës.

Sipas saj, vendimi i Gjykatës Kushtetuese është thelbësor për respektimin e rendit kushtetues, funksionimin demokratik të institucioneve dhe garantimin e stabilitetit institucional në vend.

"Besojmë se kërkesa jonë është e drejtë dhe se argumentet tona janë të qarta e të bazuara në Kushtetutë. Presim një trajtim profesional nga Gjykata dhe miratimin e kërkesës sonë. Ashtu siç e kemi cekur edhe në Kërkesë, presim që Gjykata të nxjerrë Aktgjykim me të cilin vendos:-të anulojë Dekretin nr. 24/2026, të datës 06.03.2026, të Presidentes për shpërndarjen e Legjislaturës së Dhjetë (X) të Kuvendit të Republikës së Kosovës; -si dhe të urdhërojë deputetët e Kuvendit që të vazhdojnë përpjekjet për zgjedhjen e Presidentit/Presidentes së re, brenda afatit kushtetues prej 60 ditësh nga nxjerrja e këtij aktgjykimi. Vendimi i Gjykatës Kushtetuese është thelbësor për respektimin e rendit kushtetues, funksionimin demokratik të institucioneve dhe garantimin e stabilitetit institucional në vend", ka shkruar Nagavci në Facebook.