Qorrolli: Nuk duhej të pezullohej puna e Kuvendit

Deputeti Vigan Qorrolli nga Lëvizja Vetëvendosje ka deklaruar se partia e tij e konsideron antikushtetues dekretin e lëshuar nga Vjosa Osmani për shpërndarjen e legjislaturës së dhjetë të Kuvendit të Kosovës.

Qorrolli tha se mëngjesin e 6 marsit presidentja nxori një dekret për shpërndarjen e Kuvendit, të cilin Vetëvendosje e vlerëson si të nxituar dhe në kundërshtim me Kushtetutën.

Sipas tij, dekreti u mor vetëm disa orë pas mosfillimit zyrtar të seancës për zgjedhjen e presidentit. Ai theksoi se megjithëse nuk kishte shumicë të kualifikuar prej dy të tretave për të nisur procedurën e zgjedhjes së presidentit, kuorumi ekzistonte.

"Sipas Rregullores së Punës së Kuvendit, kuorumi për fillimin e seancës është 61 deputetë të pranishëm, ndërsa shumica e kualifikuar prej dy të tretash kërkon 80 deputetë. Kryetarja e Kuvendit do të duhej t’i thërriste deputetët një nga një dhe t’u shpërndante fletëvotimet sipas nominimeve përkatëse", tha ai në RTK-në.

“Kështu që ne kemi sfiduar edhe si grup parlamentar me 30 deputetë, ndërkohë që edhe të shtunën edhe Qeveria e Kosovës e drejtuar nga kryeministri Albin Kurti gjithashtu e ka atakuar këtë dekret. Edhe të hënën ka dalë masa e përkohshme që ne besojmë që ka qenë deri diku e padrejtë, sepse ne kemi kërkuar që të suspendohet, të vihet një masë e përkohshme ndaj dekretit deri në shqyrtimin meritor, për shkak se gjykimi mbi meritat e merr kohën e caktuar dhe ne nuk mund t’i bëjmë presion Gjykata Kushtetuese e Kosovës që të sjellë një aktgjykim mbi meritat brenda pak ditësh", pohoi Qorrolli.

Sipas tij, gjykata ka qenë shumë ekspeditive, brenda 48 orësh ka vendosur masën e përkohshme, por në standardin e saj sipas detyrës zyrtare gjithashtu e ka pezulluar edhe punën e Kuvendi i Kosovës që të ndërmarrë veprime të tjera, jo vetëm për çështjen e zgjedhjes së presidentit.

"Ndërkohë që ne do ta mirëkuptonim që ajo do të kërkonte ndalimin e punës së zgjedhjes së presidentit të ri, por jo suspendimin e punës së Kuvendit deri më 31 mars, sepse ne kishim të caktuar një seancë plenare në orën 14 për të kaluar disa marrëveshje ndërkombëtare në vlerë totale prej 121 milionë eurosh”, tha ai. /rtk