Spiropali: Heqja e masave të BE-së ndaj Kosovës është lajm i mirë

Nëpërmjet një statusi në Facebook, Elisa Spiropali është shprehur se heqja e masave të BE ndaj Kosovës është konfirmim i vendosmërisë dhe tregon se Kosova di të ushtrojë sovranitetin e saj më përgjegjësi.

Sipas Spiropalit ky moment duhet lexuar edhe si mundësi, pra jo vetëm si arritje.

Postimi i plotë:

Heqja e masave të BE-së ndaj Kosovës është lajm i mirë, por është mbi të gjitha konfirmim i diçkaje që e kemi besuar gjithmonë: kur ka maturi, koordinim dhe vendosmëri, rrugët hapen.

Kosova ka treguar se di të ushtrojë sovranitetin e saj me përgjegjësi — dhe kjo është arsyeja pse Europa ka reaguar pozitivisht. Nuk është rastësi. Është rezultat i zgjedhjeve të vështira të bëra në momentin e duhur.

Por ky moment duhet lexuar edhe si mundësi, jo vetëm si arritje. Statusi i vendit kandidat nuk është dhuratë — është hap logjik i radhës për një demokraci që ka qëndruar e vendosur në vlerat europiane edhe kur presioni ka qenë i jashtëzakonshëm. Bashkimi Europian duhet ta bëjë këtë hap.Jo si gjest solidariteti, por si vendim strategjik me kosto të qartë nëse shtyhet më tej.

Rajoni ynë sot është në një udhëkryq historik. Ose do të hyjë në një fazë të re demokratizimi përmes integrimit europian, ose do të mbetet peng i krizave ciklike, tensioneve dhe shteteve të dobëta. Integrimi nuk është më aspiratë politike, është domosdoshmëri jetike për të ndërtuar institucione të forta, ekonomi funksionale dhe një rend pa kapje të shtetit e me sundim te ligjit. Pa këtë drejtim, Ballkani mbetet periferi në fat të vet. Me këtë drejtim, bëhet pjesë e një Europe që nuk negocion me dobësinë, por ndërton forcë përmes rregullit.