Shembja e rrugës, pezullohen nga puna dy inspektorët e zonës dhe zyrtari përgjegjës

Kryetari i Komunës së Prishtinës, Përparim Rama, ka njoftuar se janë pezulluar nga puna dy inspektorë të zonës, ku ka ndodhur shembje e një pjese të rrugës “Don Shtjefën Kurti”.

Po ashtu nga puna u pezullua edhe zyrtari përgjegjës për lëndën, raporton Zeri.info.

“Punishtet ndërtimore duhet t’i nënshtrohen inspektimit të rreptë dhe të vazhdueshëm nga Inspektorati komunal, në mënyrë që të garantohet siguria e punëtorëve, qytetarëve dhe cilësia e punimeve sipas projektit të pranuar.

Njëkohësisht, edhe kompanitë private të ndërtimit duhet të marrin përgjegjësinë e plotë për respektimin e standardeve të sigurisë dhe kushteve të punës. Çdo shkelje nga ana e tyre duhet të përballet me masa të rënda ligjore”, ritheksoi Rama. /Zëri