Inteligjenca Artificiale tani vjen në Paint dhe Notepad
Microsoft po u shton aplikacioneve të saj tradicionale Paint dhe Notepad në Windows aftësi të reja të bazuara në Al, duke i kthyer këto mjete të thjeshta në platforma më të avancuara për krijim dhe redaktim përmbajtjeje. Përditësimet po u shpërndahen aktualisht përdoruesve të Windows Insiders në kanalet Windows 11 Canary dhe Dev dhe sjellin veçori që deri tani nuk kanë qenë të zakonshme për aplikacione të tilla bazike.
Në Notepad, përdoruesit tani mund të përfitojnë nga funksione të reja të Al, si rishkrimi i tekstit, përmirësimi i stilit, si dhe përmbledhja automatike e përmbajtjes, duke e bërë aplikacionin më të dobishëm për shënime të shpejta apo redaktime. Ndërkohë, Paint po fiton aftësi të reja krijuese, përfshirë gjenerimin e ilustrimeve digjitale përmes Al, si dhe krijimin e menjëhershëm të faqeve për ngjyrosje, duke u dhënë përdoruesve më shumë mundësi për kreativitet pa pasur nevojë për mjete të avancuara dizajni. Këto përditësime janë pjesë e strategjisë më të gjerë të Microsoft për të integruar Al në përvojën e përditshme të Windows, edhe në aplikacionet më të thjeshta, duke i bërë ato më funksionale për përdoruesit.
Sipas një studimi, amerikanët që bisedojnë çdo ditë me inteligjencën artificiale përballen me shkallë depresioni dukshëm më të lartë sesa përdoruesit e rastit. “Nivele më të larta të përdorimit të IA-së u shoqëruan me rritje modeste të simptomave depresive”, shkruan studiuesit në JAMA Network Open, duke vënë në dukje se shanset për të paktën depresion të moderuar u rritën me 30 për qind midis përdoruesve të përditshëm.
Anketa me pjesëmarrjen e 20.847 të rriturve amerikanë e kryer midis prillit dhe majit 2025 zbuloi se 10.3 për qind raportuan përdorim të përditshëm gjenerues të IA-së, përfshirë 5.3 për qind që iu drejtuan chatbot-eve disa herë gjatë ditës së tyre. Përdoruesit më të rinj dukeshin veçanërisht të prekshëm ndaj efekteve të shëndetit mendor, megjithëse nuk është e qartë nëse IA shkakton depresion apo individët e depresionuar thjesht kërkojnë më shumë ndërveprim dixhital. Studiuesit theksuan se kërkohen hetime të mëtejshme për të përcaktuar nëse marrëdhënia është shkakësore dhe për të shpjeguar pse efektet ndryshojnë midis grupmoshave të ndryshme.
