Rrëzimi i avionit në Kolumbi: Katër fëmijë gjenden të gjallë në Amazon pas 40 ditësh
Katër fëmijë janë gjetur të gjallë pas më shumë se një muaj pasi avioni i tyre u rrëzua në xhunglën e Amazonës së Kolumbisë, bëri të ditur presidenti i vendit.
Vëllezërit e motrat, të moshës trembëdhjetë, nëntë, katër vjeç dhe një foshnjë një vjeç, ishin në bordin e avionit me nënën e tyre, një pilot dhe një bashkëpilot kur ai u rrëzua më 1 maj.
Nëna e tyre dhe të rriturit e tjerë në bordin e avionit vdiqën.
Presidenti Gustavo Petro tha se gjetja e fëmijëve pas javësh kërkimi ishte “një gëzim për të gjithë vendin”.Ai e quajti atë një “ditë magjike”, duke theksuar se “Ata ishin vetëm, ata vetë arritën një shembull të mbijetesës totale që do të mbetet në histori. Këta fëmijë janë sot fëmijët e paqes dhe fëmijët e Kolumbisë”.
Ai bëri të ditur se fëmijët po merrnin kujdes mjekësor dhe se kishte folur me gjyshin e tyre.
Fëmijët që atëherë janë dërguar në kryeqytetin e Kolumbisë, Bogota, ku ambulancat po prisnin për t’i dërguar në spital për trajtim të mëtejshëm mjekësor.
Avioni Cessna 206, me të cilin po udhëtonin fëmijët dhe nëna e tyre përpara përplasjes, po fluturonte nga Araracuara, në provincën e Amazonas, për në San José del Guaviare, kur lëshoi ënjë alarm për shkak të dështimit të motorit.Trupat e tre të rriturve që kishin qenë me ta u gjetën në vendin e rrëzimit nga ushtria.
Informacioni paraprak nga autoriteti i aviacionit civil sugjeroi se fëmijët u shpëtuan nga rrënojat dhe u endën në pyllin e shiut për të gjetur ndihmë, njoftoi agjencia e lajmeve Reuters.
Filloi një kërkim masiv dhe në maj, shpëtuesit gjetën sende të lëna pas nga fëmijët , duke përfshirë një shishe pijeje për një fëmijë, një palë gërshërë, një kravatë flokësh dhe një strehë të improvizuar.
U zbuluan gjithashtu gjurmë të vogla të këmbëve, të cilat i shtynë ekipet e kërkimit të besonin se i kishin mbijetuar përplasjes dhe ishin gjallë në pyllin tropikal, i cili është shtëpia e jaguarëve, gjarpërinjve dhe grabitqarëve të tjerë.
Fëmijët i përkasin grupit indigjen Huitoto dhe anëtarët e komunitetit të tyre shpresonin që njohuritë e tyre për frutat dhe aftësitë e mbijetesës në xhungël do t’u jepnin atyre një shans më të mirë për të mbijetuar.
Njerëzit indigjenë iu bashkuan operacionit të kërkimit dhe helikopterët transmetuan një mesazh nga gjyshja e fëmijëve, të regjistruar në gjuhën Huitoto, duke u kërkuar atyre të ndalonin lëvizjen për ta bërë më të lehtë gjetjen e tyre.
Presidenti i Kolumbisë u kritikua muajin e kaluar kur një postim në Twitter i publikuar në llogarinë e tij njoftoi se fëmijët ishin gjetur.
Ai e fshiu postimin në Twitter të nesërmen duke thënë se informacioni që zyrës së tij i ishte dhënë nga agjencia e mirëqenies së fëmijëve të Kolumbisë nuk mund të konfirmohej./dukagjini
