Ushtria kineze e kthen mikun më të mirë të njeriut në makinë vrasëse
Gjatë stërvitjeve të fundit ushtarake me Kamboxhian, ushtria e Kinës shfaqi një qen robot me një pushkë automatike të montuar në shpinë, duke e kthyer në thelb mikun më të mirë (elektronik) të njeriut në një makinë vrasëse.
“Ai mund të shërbejë si një anëtar i ri në operacionet tona luftarake urbane, duke zëvendësuar anëtarët tanë (njerëzorë) për të kryer zbulimin dhe për të identifikuar (armikun) dhe për të goditur objektivin,” thotë një ushtar i identifikuar si Chen Wei në një video nga transmetuesi shtetëror CCTV.
Videoja dyminutëshe e bërë gjatë stërvitjes Kinë-Kamboxhia “Golden Dragon 2024” tregon gjithashtu qenin robot që ecën, kërcen, shtrihet dhe lëviz mbrapa nën kontrollin e një operatori në distance, raporton CNN, transmeton Klankosova.tv.
Në një stërvitje, roboti me pushkë e çon një njësi këmbësorie në një ndërtesë të simuluar.
Pjesa e fundit e videos tregon gjithashtu një pushkë automatike të montuar nën një dron ajror me gjashtë rotor, duke ilustruar atë që video thotë se është “larmia e pajisjeve inteligjente pa pilot” të Kinës.
Përdorimi ushtarak i qenve robotë – dhe sigurisht dronëve të vegjël ajrore – nuk është asgjë e re. Një video e CCTV nga viti i kaluar theksoi gjithashtu qentë elektronikë të Kinës të armatosur me pushkë në një stërvitje të përbashkët që përfshin ushtarakët kinezë, kamboxhianë, malajzianë, tajlandezë dhe vietnamezë të mbajtur në Kinë nëntorin e kaluar.
